ବଲାଙ୍ଗୀର: ଜିଲ୍ଲାରେ କାର୍ଯ୍ୟକ୍ଷମ ହେଲା କୋଭିଡ-19 ଡାକ୍ତରଖାନା । ମଙ୍ଗଳବାର ଜିଲ୍ଲାର କିମ୍ସ ପରିସରରେ ଏହି କୋଭିଡ-19 ଡାକ୍ତରଖାନା ଉଦଘାଟିତ ହୋଇଛି। ଜିଲ୍ଲାପାଳ ଅରିନ୍ଦମ ଡାକୁଆ ଏହାକୁ ଉଦଘାଟନ କରିଛନ୍ତି । ଯେଉଁଥିରେ 200 ଶଯ୍ୟା ଥିବାବେଳେ 20ଟି ଆଇସିୟୁ ଶଯ୍ୟା ରହିଛି ।
ସେହିପରି ଏଠାରେ 3 ଜଣ ଡାକ୍ତର ନିୟୋଜିତ ଥିବାବେଳେ ମୋଟ 60 ଜଣ କର୍ମଚାରୀ ମଧ୍ୟ ନିୟୋଜିତ ହୋଇଛନ୍ତି । ତେବେ ଓଡିଶା ସରକାର ଓଏମସି ଓ କିମ୍ସ ସାଇଣ୍ଟିଟିଫିକ ଅନୁଷ୍ଠାନ ମଧ୍ୟରେ ରାଜିନାମା ସ୍ବାକ୍ଷରିତ ହୋଇଥିଲା । ଏହି ରାଜିନାମା ଆଧାରରେ ନିର୍ଦ୍ଧାରିତ ସମୟରେ ଏହି ଡାକ୍ତରଖାନାକୁ କାର୍ଯ୍ୟକ୍ଷମ କରାଯାଇଛି। ତେବେ ଅନ୍ୟ କ୍ବାରେନଣ୍ଟାଇନ ଓ କେୟାର ସେଣ୍ଟରରୁ ରୋଗୀଙ୍କୁ ଏଠାକୁ ଅଣାଯିବ । ଏଥିପାଇଁ ଆବଶ୍ୟକୀୟ ଆମ୍ବୁଲାନ୍ସର ମଧ୍ୟ ବ୍ୟବସ୍ଥା କରାଯାଇଛି।
ଏଥିସହିତ ବଲାଙ୍ଗୀରରେ ବର୍ତ୍ତମାନ ସୁଦ୍ଧା କୌଣସି କୋରୋନା ଆକ୍ରାନ୍ତ ଚିହ୍ନଟ ହୋଇ ନଥିବା ବେଳେ ଆଗକୁ କୌଣସି ବିପତ୍ତି ଆସିଲେ ଏହି ଡାକ୍ତରଖାନା ଉପଯୋଗୀ ହେବ ବୋଲି ଜିଲ୍ଲାପାଳ କହିଛନ୍ତି ।
ବଲାଙ୍ଗୀରରୁ ଶେଖ ମହମ୍ମଦ ୱାହିଦ, ଇଟିଭି ଭାରତ
