ବଲାଙ୍ଗୀର: ପ୍ରଳୟଙ୍କାରୀ ବନ୍ୟା ପରେ ଏବେ ବି ଅନେକ ଜାଗାରେ ସ୍ଥିତି ଗମ୍ଭୀର । ଜିଲ୍ଲା ପ୍ରଶାସନ ପକ୍ଷରୁ ଜାରି ରହିଛି ଉଦ୍ଧାର ଓ ରିଲିଫ କାର୍ଯ୍ୟ। ସେପଟେ କିଛି ଗାଁ ଏବେବି ପାଣି ଘେରରେ ଥିବା ବେଳେ ପହଁଚିପାରିନି ରିଲିଫ ସାମଗ୍ରୀ । ବାହ୍ୟ ଜଗତରୁ ବିଚ୍ଛିନ୍ନ ରହିଛି ଅନେକ ଗ୍ରାମ । ଏବେବି ଅନେକ ଜାଗାରେ ଟ୍ରେନ ଚଳାଚଳ ବନ୍ଦ ରହିଛି । ବର୍ତ୍ତମାନ ସୁଦ୍ଧା ଦେଓଗାଁ ବ୍ଲକ, ଗୁଡ଼ଭେଳା ବ୍ଲକ, ଲୋଇସିଙ୍ଗା ବ୍ଲକ ଓ ପୁଇଁତଲା ବ୍ଲକର ଅନେକ ଗ୍ରାମ ଏବେ ମଧ୍ୟ ପାଣି ଘେରରେ ଅଛନ୍ତି ।
ଏସବୁ ସ୍ଥାନରେ ମୋଟ 50ରୁ ଉର୍ଦ୍ଧ୍ବ ରିଲିଫ କ୍ୟାମ୍ପ ଖୋଲିଛି ପ୍ରଶାସନ। ବଲାଙ୍ଗୀରରେ ଗତ ପ୍ରଥମ ଦୁଇ ଦିନ ମଧ୍ୟରେ 576 ମିମି ବର୍ଷା ହୋଇଥିବା ବେଳେ ଗତ କାଲି 371 ମିମି ବର୍ଷା ରେକର୍ଡ ହୋଇଛି। ବର୍ଷାରେ ବଲାଙ୍ଗୀରର ପ୍ରାୟ ସବୁ ଅଞ୍ଚଳ ଜଳମଗ୍ନ ଥିବା ବେଳେ ବିପୁଳ କ୍ଷୟକ୍ଷତି ହୋଇଛି । ସେହିପରି ବେସରକାରୀ ରିପୋର୍ଟ ମୁତାବକ ଦୁଇ ଜଣଙ୍କ ଏଥିରେ ମୃତ୍ୟୁ ମଧ୍ୟ ହୋଇଥିବାର ଅଭିଯୋଗ ହୋଇଛି । ସହରରେ ବର୍ତ୍ତମାନ ବିଜୁଳି ସରବରାହ ସ୍ବାଭାବିକ ହେବାରେ ଲାଗି ଥିବା ବେଳେ ଗ୍ରାମାଞ୍ଚଳ ଏବେବି ଅନ୍ଧାରରେ ଅଛନ୍ତି । ସେହିପରି ବଲାଙ୍ଗୀରରୁ ଟିଟିଲାଗଡ଼, ପାଟଣା ଗଡ଼, ସମ୍ବଲପୁର ପାଇଁ ଯୋଗାଯୋଗ ବିଛିନ୍ନ ହୋଇଛି । ସେହିପରି ରେଳ ଲାଇନ ଧୋଇ ଯାଇଥିବାରୁ ବଲାଙ୍ଗୀର ପଟୁ ଆସୁଥିବା ସମସ୍ତ ଟ୍ରେନର ଚଳାଚଳ ଆଜି ବି ବନ୍ଦ ରହିଛି ।
ସେପଟେ ଜିଲ୍ଲା ପ୍ରଶାସନ ସବୁ ଠିକ ଠାକ କରିବା ପାଇଁ ପ୍ରଚେଷ୍ଟା ଜାରି ରଖିଥିବା ବେଳେ ଜିଲାପାଳ ନିଜେ ଏହାର ସିଧା ସଳଖ ତଦାରଖ କରୁଛନ୍ତି । ଲୋକଙ୍କୁ ପାଣି ଘେରରୁ ଉଦ୍ଧାର କରାଯାଇ ରିଲିଫ କେନ୍ଦ୍ର ମାନଙ୍କରେ ରଖିଥିବାର କହିଛନ୍ତି । ସେହିପରି ଏହି ବନ୍ୟାରେ ଅନେକ ଘରଦ୍ବାର ଭାଙ୍ଗି ଥିବା ବେଳେ ହଜାର ହଜାର ହେକ୍ଟର ଚାଷ ଜମିରେ ପାଣି ମାଡିଯାଇଛି । ତେବେ ଏସବୁର ଆକଳନ ପାଇଁ ସମୟ ଲାଗିବ ଓ ଆଙ୍କାଳନ ହେଲେ ପ୍ରକୃତ କ୍ଷୟକ୍ଷତି ଜଣା ପଡିବ ବୋଲି ପ୍ରଶାସନ ପକ୍ଷରୁ କୁହା ଯାଇଛି ।
ବଲାଙ୍ଗୀରରୁ ଶେଖ ୱାହିଦ ମହମ୍ମଦ, ଇଟିଭି ଭାରତ
