ବଲାଙ୍ଗୀର: ପୁଣି ତ୍ରୀବ ହୋଇଛି ପୁନଃ ହାଇକୋର୍ଟ ସ୍ଥାୟୀ ବେଞ୍ଚ ସ୍ଥାପନା ଦାବି । ପୂର୍ବ ନିଷ୍ପତ୍ତି ଅନୁସାରେ ଆଜି ଠାରୁ ଦୁଇ ଦିନିଆ ବନ୍ଦ ପାଳନ କରିଛନ୍ତି ବଲାଙ୍ଗୀର ଓକିଲ ସଂଘ । ଏଥିସହ ଜିଲ୍ଲାର ବିଭିନ୍ନ ଅନୁଷ୍ଠାନଗୁଡିକ ମଧ୍ୟ ଦୁଇ ଦିନିଆ ବନ୍ଦ ପାଳନ କରିଛି ।
ପୂର୍ବ ନିଷ୍ପତ୍ତି ଅନୁସାରେ, ପ୍ରତି ମାସର ତୃତୀୟ ବୁଧବାର ଓ ଗୁରୁବାର 2 ଦିନ ଧରି ବଲାଙ୍ଗୀର ବନ୍ଦ ରଖିବାକୁ କ୍ରିୟା ଅନୁଷ୍ଠାନ ପକ୍ଷରୁ ସ୍ଥିର କରାଯାଇଥିଲା । ଯାହାକୁ ନେଇ ଜିଲ୍ଲାର ସମସ୍ତ ସରକାରୀ ଅନୁଷ୍ଠାନଗୁଡିକ ବନ୍ଦ କରାଯାଇଛି । ଯେଉଁଥିରେ କେନ୍ଦ୍ର ଓ ରାଜ୍ୟ ସରକାରଙ୍କ ସବୁ ସରକାରୀ କର୍ଯ୍ୟାଳୟ, କୋର୍ଟ କଚେରୀ ବନ୍ଦ ଥିବା ବେଳେ ବ୍ୟାଙ୍କ ଓ ବୀମା ଅନୁଷ୍ଠାନ ମଧ୍ୟ ବନ୍ଦ ରହିଛି । କିନ୍ତୁ ଦୋକାନ ବଜାର, ସ୍କୁଲ କଲେଜ ଓ ଗାଡି ଚଳାଚଳ ଉପରେ ବନ୍ଦର ପ୍ରଭାବ ପଡିନାହିଁ ।
ସେପଟେ ଏହି ବନ୍ଦକୁ ଜିଲ୍ଲାର ଶତାଧିକ ସଙ୍ଗଗଠନ ଓ ଅନୁଷ୍ଠାନ ସମର୍ଥନ ଦେଇଛନ୍ତି । ଏମାନେ ସମସ୍ତେ ବଲାଙ୍ଗୀର ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଛନ୍ତି । ତେବେ ଦୁଇ ଦିନିଆ ବନ୍ଦରେ ଜିଲ୍ଲାର ସମସ୍ତ ଉନ୍ନୟନ କାମ ଠପ ହେବାକୁ ଥିବାବେଳେ ଲୋକେ ହଇରାଣ ହରକତର ସାମ୍ନା କରୁଛନ୍ତି । ବନ୍ଦକୁ ନଜରରେ ରଖି ସୁରକ୍ଷା ବ୍ୟବସ୍ଥା କଡାକଡି କରାଯିବା ସହ ବ୍ୟାପକ ପୋଲିସ ମୁତୟନ ହୋଇଛି ।
ବଲାଙ୍ଗୀରରୁ ଶୈଖ ମହମ୍ମଦ ୱାହିଦ, ଇଟିଭି ଭାରତ
