ବଲାଙ୍ଗୀର: ଜିଲ୍ଲା ପୋଲିସକୁ ବଡ ସଫଳତା । ପୋଲିସ ମୋଟର ସାଇକେଲ ଡିକି ଭାଙ୍ଗି ଲୁଟ କରୁଥିବା ଏକ 5 ଜଣିଆ ଗ୍ୟାଙ୍ଗକୁ ଗିରଫ କରିଛି । ଗିରଫ ଅଭିଯୁକ୍ତ ହେଲେ ଏମ ସାଲୁ ରେଡ୍ଡୀ, ଏ ଶିବା, ଏ ସନ୍ତୋଷ, ଡ଼ି ଗାନ୍ଧୀ ଏବଂ ଜଣେ ମହିଳା ସହକର୍ମୀ । ଏମାନେ ସମସ୍ତେ ଗଞ୍ଜାମ ଆସ୍କାର ହୋଇଥିବା ଜଣାପଡିଛି । ସେମାନଙ୍କ ନିକଟରୁ ଲୁଟରେ ବ୍ୟବହାର ହେଉଥିବା ସାମଗ୍ରୀ ସହ ନଗଦ 20 ଟଙ୍କା, 11ଟି ମୋବାଇଲ ଓ 2ଟି ବାଇକ ଜବତ ହୋଇଛି ।
ସୂଚନାନୁସାରେ, ଦୀର୍ଘ ଦିନରୁ ଏହି ଗ୍ୟାଙ୍ଗ ବଲାଙ୍ଗୀରର ଏକ ଭଡା ଘରେ ରହୁଥିଲେ । ସକାଳ ହେଲେ ଲୁଟ କରିବାକୁ ସମସ୍ତେ ବାହାରି ପଡୁଥିଲେ । ବିଶେଷ କରି ଏମାନେ ଗ୍ରାମାଞ୍ଚଳ ଲୋକଙ୍କୁ ଟାର୍ଗେଟ କରୁଥିଲେ । ଏହା ସହିତ ବ୍ୟାଙ୍କରୁ ଟଙ୍କା ଉଠାଉଥିବା ଲୋକଙ୍କ ପିଛା କରିବା ସହ ତାଙ୍କ ଗାଡି ଡିକି ଭାଙ୍ଗି ଟଙ୍କା ସବୁ ଲୁଟୁଥିଲେ ।
ଏମାନଙ୍କ ନାଁରେ ଟିଟିଲାଗଡ଼ରେ ୩ ଟି ମାମଲା, ମୁରି ବହାଳରେ ଗୋଟିଏ, ସୈନ୍ତଳାରେ ଗୋଟିଏ ମାମଲା ରୁଜୁ ହୋଇଥିଲା । ପୋଲିସ ଘଟଣାର ତଦନ୍ତ ପରେ ଶନିବାର ଏହି ଗ୍ୟାଙ୍ଗକୁ ଧରିବାରେ ସଫଳ ହୋଇଥିଲା । ଗିରଫ ପରେ ସମସ୍ତଙ୍କୁ କୋର୍ଟ ଚାଲାଣ କରିଥିବାବେଳେ ପୁଣି ରିମାଣ୍ଡରେ ଆଣି ପଚରାଉଚରା କରିବ ବୋଲି ସୂଚନା ରହିଛି ।
ବଲାଙ୍ଗୀରୁ ଶେଖ ମହମ୍ମଦ ୱାହିଦ୍, ଇଟିଭି ଭାରତ
