ଅନୁଗୋଳ: ଦୁର୍ବୃତ୍ତଙ୍କ ତୁମୁଳକାଣ୍ଡ । ଘରେ ପଶି ପୋଡିଦେଲେ କାର । ସିସିଟିଭିରେ କଏଦ ହେଲା ଦୃଶ୍ୟ । ଏଭଳି ଘଟଣା ଘଟିଛି ଅନୁଗୋଳ ଜିଲ୍ଲା ତାଳଚେରର ସନ୍ଥପଡା ଗାଁରେ ।
ମିଳିଥିବା ସୂଚନା ଅନୁସାରେ ସନ୍ଥପଡା ଗାଁର ବାବୁଲି ସାମଲ ପରିବାର ସମେତ ଘରେ ଶୋଇଥିବା ବେଳେ କିଛି ଦୁର୍ବୃତ୍ତ ତାଙ୍କ ଘରକୁ ଆସି କବାଟ ଝରକା ବାଡେଇଥିଲେ । ଏହାସହ ବାବୁଲି ଓ ତାଙ୍କ ପରିବାର ଲୋକଙ୍କୁ ବାଡିଆପିଟା କରି ପଳାଇଥିଲେ । ପରେ ବିଳମ୍ବିତ ରାତିରେ ପୁଣି ଆସି ବାବୁଲିଙ୍କ ଅଗଣାରେ ଥିବା କାରରେ ନିଆଁ ଲଗାଇ ଦେଇଥିଲେ । ପରିବାରଲୋକ ଏଭଳି ସ୍ଥିତି ଦେଖି ପୋଲିସକୁ ସୂଚନା ଦେଇଥିଲେ ।
ପୋଲିସ ଓ ଦମକଳ ବାହିନୀ ପହଞ୍ଚିବା ପୂର୍ବରୁ ଦୁର୍ବୃତ୍ତମାନେ ଘଟଣା ସ୍ଥଳରୁ ଚମ୍ପଟ ମାରିଥିଲେ । ଦମକଳ ବାହିନୀ ନିଆଁକୁ ଆୟତ୍ତ କରିଥିଲା । ବାବୁଲିଙ୍କ କହିବା ଅନୁଯାୟୀ କିଛି ଦିନ ପୂର୍ବରୁ ତାଙ୍କ ପଡିଶା ଘରୁ ଏକ ବିଦେଶୀ କୁକୁର ଚୋରି ହୋଇଥିଲା । ଏହି ଚୋରି ଘଟଣାରେ ପୋଲିସକୁ ସେ ସିସିଟିଭି ଦେଇ ଚୋର ଧରିବାରେ ସହଯୋଗ କରିଥିଲେ । ଏହି ରାଗରେ ଦୁର୍ବୃତ୍ତମାନେ ଏଭଳି କାଣ୍ଡ ଭିଆଇଥିବା ସନ୍ଦେହ କରୁଛନ୍ତି । ଏନେଇ ପୋଲିସ ସିସିଟିଭି ଭିଡିଓ ଆଧାରରେ ଅଧିକ ତଦନ୍ତ ଜାରି ରଖିଛି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
