ଅନୁଗୋଳ : ଅନୁଗୋଳ ଜିଲ୍ଲାରେ କମୁନି ଖରାର ପ୍ରକୋପ । ଲଗାତାର ପ୍ରାୟ ୨୦ ଦିନରୁ ଅଧିକ ଦିନ ହେବ ଲାଗି ରହିଛି ରୌଦ୍ର ତାପ । ୪୨ ଡିଗ୍ରୀ ଉପରେ ରହିଛି ତାପମାତ୍ରା । ବାହାରକୁ ବାହାରିଲେ ଦେହ ମୁହଁ ପୋଡି ଯାଉଛି । ସକାଳ ପ୍ରାୟ ୮ଟାରୁ ଆରମ୍ଭ ହେଇଯାଉଛି ଖରା । ଆଜି ଯେଉଁଭଳି ଖରା ଅନୁଭୂତ ହେଉଛି ପୂର୍ବରୁ ଏମିତି ହୋଇ ନଥିଲା । ତେଣୁ ଆଜି ତାପମାତ୍ରା ୪୪ଡିଗ୍ରୀ ପାର ହେବାର ଆଶଙ୍କା କରାଯାଉଛି ।
ତତଲା କଡେଇରେ ଅନୁଗୋଳ, ଛଟପଟ ହେଉଛନ୍ତି ଲୋକେ
ଗତ ଦୁଇ ଦିନ ପାଗରେ ସାମାନ୍ୟ ପରିବର୍ତ୍ତନ ହୋଇଥିଲା । ଦୁଇ ଦିନ ହେଲା ୪୦ଡିଗ୍ରୀ ତଳକୁ ରହିଥିଲା । ହେଲେ ଆଜି ହଠାତ ଉତ୍ତାପ ବଢି ଯାଇଛି । ଏପରିକି ରାସ୍ତାଘାଟରେ ଯାତାୟାତ ବନ୍ଦ ହୋଇଯାଇଛି । ବ୍ୟବସାୟୀମାନେ ଦୋକାନ ଖୋଲି ବସିଥିଲେ ମଧ୍ୟ ଗ୍ରାହକ ନାହାନ୍ତି । ଯେଉଁ କିଛି ଲୋକେ ଜରୁରୀ କାମରେ ବାହାରକୁ ବାହାରିଛନ୍ତି ଓଦା ଗାମୁଛା ମୁଣ୍ଡରେ ପକାଇ ବାହାରୁଛନ୍ତି । ଖରା ସାଙ୍ଗକୁ ଗରମ ପବନ ଲୋକଙ୍କୁ କଲବଲ କରୁଛି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
