ଅନୁଗୋଳ: ଚଳିତ ମାସ 1 ତାରିଖରୁ ସଡକ ସୁରକ୍ଷା କଡାକଡ଼ି ହୋଇଥିବାରୁ ପୁଣି ଅନୁଗୋଳ ଆରଟିଓ ଅଫିସରେ ପ୍ରବଳ ଭିଡ ଦେଖିବାକୁ ମିଳିଛି । ଲୋକେ ଡ୍ରାଇଭିଂ ଲାଇସେନ୍ସ କରିବା ପାଇଁ ଅଫିସରେ ସକାଳ ୧୦ ଟାରୁ ସନ୍ଧ୍ୟା ପର୍ଯ୍ୟନ୍ତ ଲମ୍ବା ଲାଇନ ଲଗାଉଥିବା ଦେଖିବାକୁ ମିଳୁଛି ।
ଗାଡି ଚାଳନା ପରୀକ୍ଷା କରାଯାଇଥିବା ସ୍ଥାନରେ ମଧ୍ୟ ଏଭଳି ପରିସ୍ଥିତି । ମହିଳା ଓ ଯୁବତୀମାନେ ମଧ୍ୟ ଲାଇସେନ୍ସ ପାଇଁ ଲମ୍ବା ଲାଇନରେ ଠିଆ ହୋଇ ରହୁଛନ୍ତି । ସରକାରଙ୍କ ତରଫରୁ ୩ମାସରୁ ଅଧିକ ମହଲତ ଦିଆ ଯାଇଥିଲେ ମଧ୍ୟ କିଛି ଲୋକ ଏହାକୁ ହାଲୁକା ଭାବେ ନେଇ ନିଜ ନିଜର ଲାଇସେନ୍ସ ଓ ଅନ୍ୟାନ୍ୟ କାଗଜପତ୍ର କରି ନଥିଲେ ।
ଏବେ କଡାକଡି ହେବାରୁ ଅଧିକ ଜୋରିମାନା ଦେବା ଭୟରେ ଲୋକେ ଦିନ ତମାମ ଠିଆ ହୋଇ ରହୁଛନ୍ତି । ତେବେ ପ୍ରବଳ ଖରା ହେଉଥିଲେ ମଧ୍ୟ ଆରଟିଓ ତରଫରୁ କୌଣସି ବ୍ୟବସ୍ଥା କରାଯାଇ ନ ଥିବାରୁ ଲାଇସେନ୍ସ ପାଇଁ ଆସିଥିବା ଲୋକେ ଅସନ୍ତୋଷ ପ୍ରକାଶ କରିଛନ୍ତି । ଅନ୍ୟ ପକ୍ଷରେ ଆରଟିଓ କାର୍ଯ୍ୟାଳୟରେ ଆବଶ୍ୟକ କର୍ମଚାରୀ ନଥିବାରୁ ମଧ୍ୟ ବିଳମ୍ବ ହେଉଛି । ଏହାକୁ ନେଇ ଲୋକେ ଅସନ୍ତୋଷ ବ୍ୟକ୍ତ କରିଛନ୍ତି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
