ଅନୁଗୋଳ: ସତକୋଶିଆ ମହାନଦୀ ଗଣ୍ଡରେ ଘଡ଼ିଆଳ କୁମ୍ଭୀର ଛୁଆ ବଢ଼ିବାରେ ଲାଗିଛନ୍ତି । ସୁରକ୍ଷିତ ଭାବେ ୨୮ଟି ଯାକ ଛୁଆ ଏବେ ବଡ଼ ହେବାକୁ ଲାଗିଲେଣି। ମା’ ଘଡ଼ିଆଳ କିଛି ସମୟ ପାଇଁ ଛୁଆଙ୍କ ଠାରୁ ଅଲଗା ହୋଇ ଖାଦ୍ୟ ଅନ୍ୱେଷଣରେ ଯାଉଛି।
ଛୁଆ ଗୁଡିକ ନଦୀରେ ଖେଳିବା ସହ ବାଲିରେ ଗଡୁଛନ୍ତି । ନିଜେ ପାଇଁ ଖାଦ୍ୟ ଯୋଗାଡ଼ ମଧ୍ୟ କରୁଛନ୍ତି । ତେବେ ଛୁଆ ମାନେ ଯେତିକି ବଡ଼ ହେଉଛନ୍ତି ସେମାନଙ୍କ ସୁରକ୍ଷା ସେତିକି କଡାକଡି କରାଯାଉଛି । ସାତକୋଶିଆ ଅଭୟାରଣ୍ୟ ଟିକରପଡା ରେଞ୍ଜ ଅନ୍ତର୍ଗତ ବଲଦମରା ନିକଟରେ ଘଡ଼ିଆଳ ଛୁଆ ଥିବାରୁ ସେ ଅଞ୍ଚଳକୁ ସମ୍ପୂର୍ଣ୍ଣ ନିଶିଦ୍ଧାଞ୍ଚଳ ଘୋଷଣା କରାଯାଇଛି । ସେ ଅଞ୍ଚଳରେ ଦୁଇଟି ଅସ୍ଥାୟୀ ଟେଣ୍ଟ କରାଯାଇଛି। ସେଠାରେ ଅସ୍ଥାୟୀ ଭାବେ କର୍ମଚାରୀଙ୍କୁ ନିୟୋଜିତ କରାଯାଇଛି।
ଏହାଛଡା ସ୍ୱତନ୍ତ୍ର ସ୍କ୍ବାର୍ଡ ଗଠନ କରାଯାଇଛି। ସ୍କ୍ବାର୍ଡ ଦିନରାତି କାଠ ଡ଼ଙ୍ଗାରେ ପାଇଁତରା ମାରୁଛନ୍ତି । ଅତ୍ୟାଧୁନିକ କ୍ୟାମେରାରେ ଘଡ଼ିଆଳ ମାନଙ୍କ ଗତିବିଧି ଲକ୍ଷ କରାଯାଉଛି। ତେଣୁ, ଗତ ମେ ମାସ ୨୨ ତାରିଖରେ ସେଠାରେ ଘଡ଼ିଆଳ ଛୁଆ ଜନ୍ମ ହୋଇଥିଲେ। ସେବେଠାରୁ ସେମାନଙ୍କୁ ବନ ବିଭାଗ ତରଫରୁ ସୁରକ୍ଷା ଦିଆଯାଉଛି। ଘଡ଼ିଆଳ ଏକ ବିରଳ ପ୍ରଜାତିର ପ୍ରାଣୀ । ସବୁ ସ୍ଥାନରେ ଏହି ପ୍ରଜାତିର ପ୍ରାଣୀ ଦେଖା ଯାଆନ୍ତି ନାହିଁ । ଦୀର୍ଘ ୪୦ ବର୍ଷ ପରେ ସତକୋଶିଆରେ ପ୍ରାକୃତିକ ପରିବେଶରେ ଘଡ଼ିଆଳ ଛୁଆ ଦେବା ଏକ ବିରଳ ଘଟଣା। ଏନେଇ ବିଭାଗୀୟ ଅଧିକାରୀ ସୂଚନା ଦେଇଛନ୍ତି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
