ଅନୁଗୋଳ: ସଡକ ଦୁର୍ଘଟଣାରେ ଦୁଇ ବିଦ୍ୟୁତ କର୍ମଚାରୀଙ୍କ ମୃତ୍ୟୁକୁ ନେଇ ତୁମ୍ବିତୁଫାନ । ନିଜ କର୍ମଚାରୀଙ୍କୁ ଚିହ୍ନିଲାନି ଠିକା ସଂସ୍ଥା । କ୍ଷତିପୂରଣ ଦାବିରେ ବିଳମ୍ବିତ ରାତି ପର୍ଯ୍ୟନ୍ତ ମୃତଦେହକୁ ଅଟକ ରଖିଲେ ବିଭାଗୀୟ କର୍ମଚାରୀ । ଯାହାକୁ ନେଇ ପୋଲିସ ଏବଂ ଠିକା ସଂସ୍ଥାକୁ ନାକେଦମ ହେବାକୁ ପଡିଛି ।
ସୂଚନା ଅନୁଯାୟୀ, ଗତକାଲି ପୂର୍ବାହ୍ନ ପ୍ରାୟ 11ଟା ବେଳେ ଅନୁଗୋଳ ସଦର ଥାନା ଅନ୍ତର୍ଗତ ୫୫ ନମ୍ବର ଜାତୀୟ ରାଜପଥର ମୂଷାପାପୁଲି ନିକଟରେ ମର୍ମନ୍ତୁଦ ସଡକ ଦୁର୍ଘଟଣା ଘଟିଥିଲା । ଟ୍ରକ ଚାପାରେ ଦୁଇ ବିଦ୍ୟୁତ ବିଭାଗ କର୍ମଚାରୀ ପ୍ରାଣ ହରାଇଥିଲେ । ମୃତକମାନେ ଥିଲେ ସନ୍ତୋଷ କୁମାର ସାହୁ ଏବଂ ପବିତ୍ର ବେହେରା । ଉଭୟ ଏକ ମଟର ସାଇକେଲ ଯୋଗେ ଇଲେକ୍ଟ୍ରି ମିଟର ଲଗାଇବା ଲଗାଇବାକୁ ଯାଉଥିଲା ବେଳେ ହଠାତ ସେମାନଙ୍କ ଉପରେ ଟ୍ରକଟି ମାଡି ଯାଇଥିଲା । ଫଳରେ ଘଟଣାସ୍ଥଳରେ ହିଁ ଉଭୟଙ୍କ ମୃତ୍ୟୁ ହୋଇଥିଲା । ତୁରନ୍ତ ଘଟଣାସ୍ଥଳରେ ପୋଲିସ ପହଞ୍ଚି ଦୁର୍ଘଟଣା ଘଟାଇଥିବା ଟ୍ରକ ଜବତ କରିବା ମୃତଦେହ ବ୍ୟବଚ୍ଛେଦ ପାଇଁ ପଠାଇ ଦେଇଥିଲା ।
ସେପଟେ ମୃତଦେହ ଡାକ୍ତରଖାନାରେ ପହଞ୍ଚିବା କ୍ଷଣି ସମସ୍ତ ବିଭାଗୀୟ କର୍ମଚାରୀମାନେ କ୍ଷତିପୂରଣ ପାଇଁ ଅଡ଼ି ବସିଥିଲେ । ଯାହାକୁ ନେଇ ଦୀର୍ଘ 12 ଘଣ୍ଟା କଳା ରାତି ପ୍ରାୟ 12ଟା ପର୍ଯ୍ୟନ୍ତ ମୃତଦେହ ପଡି ରହିଥିଲା । ମୃତକମାନେ ଟାଟା ପାୱାର ଠାରୁ ସବଲେଟରେ ନେଇଥିବା କମ୍ପାନୀ ଶ୍ୟାମ ପାୱାରରେ କାମ କରୁଥିଲେ । କିନ୍ତୁ ଠିକା ସଂସ୍ଥା ସନ୍ତୋଷକୁ ନିଜର କର୍ମଚାରୀ ବୋଲି ମାନିଥିବା ବେଳେ ପବିତ୍ରକୁ କୌଣସି ନିଯୁକ୍ତି ଦିଆଯାଇ ନଥିଲା ବୋଲି ଅଡ଼ି ବସିଥିଲା । ଯାହାକୁ ନେଇ ଚାପା ଉତ୍ତେଜନା ଦେଖାଦେଇଥିଲା । ଶେଷରେ ଓଡିଶା ରାଜ୍ୟ ବିଦ୍ୟୁତ କର୍ମଚାରୀ ହସ୍ତକ୍ଷେପ ପରେ କ୍ଷତିପୂରଣ ଦେବା ପାଇଁ କମ୍ପାନୀ କର୍ତ୍ତୃପକ୍ଷ ରାଜି ହୋଇଥିଲେ । ଉଭୟଙ୍କୁ କ୍ଷତିପୂରଣ ଦେବାକୁ ଠିକା ସଂସ୍ଥା ରାଜି ହେବା ପରେ ମୃତଦେହ ଛାଡିଥିଲେ ଆନ୍ଦୋଳନକାରୀ ।
ତେବେ କଥା ହେଉଛି ଯଦି ପବିତ୍ର କମ୍ପାନୀର କର୍ମଚାରୀ ନୁହେଁ ତେବେ ତାକୁ କ'ଣ ପାଇଁ ମିଟର ଲଗାଇବାକୁ ଛଡା ଯାଇଥିଲା । କେଉଁ ବ୍ୟକ୍ତି ତାଙ୍କୁ ମିଟର ଲଗାଇବା କାମରେ ନିୟୋଜିତ କରିଥିଲେ, ତାହାର ତଦନ୍ତ ହେବାର ଆବଶ୍ୟକତା ରହିଛି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
