ଅନୁଗୋଳ: ଚଳିତ ବର୍ଷ ଜଳବାୟୁରେ ପରିବର୍ତ୍ତନ ଯୋଗୁଁ ସାରା ରାଜ୍ୟରେ ଆମ୍ବ ଉତ୍ପାଦନ ବହୁ ପରିମାଣରେ କମିଯାଇଛି । ଯେଉଁ ସମୟରେ ଆମ୍ବରେ ଗଛ ଡାଳ ନଇଁ ପଡିବା କଥା ସେ ସମୟରେ ଗୋଟିଏ ହେଲେ ଆମ୍ବ ଦେଖିବାକୁ ମିଳୁନି । କେଉଁଠି କେମିତି କାଁ ଭାଁ ଗଛରେ ଅଳ୍ପ କିଛି ଆମ୍ବ ଫଳିଛି । ଏଭଳି ସମୟରେ ନିଜ ବଗିଚାରେ ଥିବା ଶତାଧିକ ଗଛରେ ବହୁଳ ଭାବେ ଆମ୍ବ ଫଳାଇ ପାରିଛନ୍ତି ଜିଲ୍ଲାର ଜଣେ ଚାଷୀ ଯୋଗେଶ୍ବର । ବଗିଚାରେ ଦେଖିଲେ ଆଖି ଲାଖିଯାଉଛି । ଆମ୍ବ ଫଳିବା ପରେ ଡାଳ ଓଜନ ହୋଇ ଭୂଇଁକୁ ସ୍ପର୍ଶ କରୁଛି । ଏପରି ଉତ୍ତମ ଚାଷ କରି ଏହି ଚାଷୀ ଅନ୍ୟ ପାଇଁ ସାଜିଛନ୍ତି ଉଦାହରଣ ।
ବଗିଚାରେ ଏତେ ପରିମାଣରେ ଆମ୍ବ ଫଳିଛି ଯେ ଦେଖିଲେ ଆଖି ଲାଖିଯାଉଛି । ଚଳିତ ବର୍ଷ ସାରା ରାଜ୍ୟରେ ଆମ୍ବ ଉତ୍ପାଦନ ଆଶାତୀତ ଭାବେ କମ ଥିବା ବେଳେ ଏହି ବଗିଚାରେ ତାର ବ୍ୟତିକ୍ରମ ଦେଖିବାକୁ ମିଳଛି । ଏହାକୁ ସମ୍ଭବ କରିଦେଖାଇଛନ୍ତି ଅନୁଗୋଳ ଜିଲ୍ଲା ଛେଣ୍ଡିପଦା ଅଞ୍ଚଳ କିସିଣ୍ଡା ଗାଁର ଆମ୍ବ ଚାଷୀ ଯୋଗେଶ୍ବର ପ୍ରଧାନ । ନିଜସ୍ବ ଜ୍ଞାନକୌଶଳ ବଳରେ ସେ ଆମ୍ବ ଚାଷ ପାଇଁ ହୋଇଥିବା ପ୍ରତିକୂଳ ଜଳବାୟୁ ସତ୍ତ୍ବେ ବି ଫଳାଇ ପାରିଛନ୍ତି ସବୁ କିସମର ଆମ୍ବ ।
ଯୋଗେଶ୍ବର ପ୍ରାୟ ୧୦ ଏକର ଜମିରେ ହଜାରେରୁ ଅଧିକ ଆମ୍ବ ଗଛ ଲଗାଇଛନ୍ତି । ବାଇଗଣ ପଲେଇ, ତୋଟାପଲ୍ଲୀ, ନିଲମ, ବମ୍ବେ ଗ୍ରୀନ, ଅମ୍ରପଲ୍ଲୀ, ମଲ୍ଲିକା, ଗୋଲାପଖାସ ସମେତ ଭଳିକି ଭଳି ଆମ୍ବ ଗଛ ଲାଗିଛି । ବର୍ଷକୁ ପ୍ରାୟ ୧୦ଲକ୍ଷ ଟଙ୍କାର ଆମ୍ବ ସେ ବିକ୍ରି କରନ୍ତି । ଚଳିତ ବର୍ଷ ସବୁଆଡେ ଆମ୍ବ ଫସଲ ପ୍ରଭାବିତ ହୋଇଥିବା ବେଳେ ଯୋଗେଶ୍ବର ନିଜ ବଗିଚାରେ ଏତେ ପରିମାଣର ଆମ୍ବ ଫଳାଇ ପାରିଛନ୍ତି । ତାଙ୍କ ବଗିଚାରୁ ଉନ୍ନତ କିସମର ଆମ୍ବ ରାଜ୍ୟର ବାହାରକୁ ଯାଉଛି ।
ବାହାରୁ ବ୍ୟବସାୟୀ ମାନେ ଆସି ଆମ୍ବ କିଣୁଛନ୍ତି । ତାଙ୍କର ଏହି ସଫଳତା ପାଇଁ କୃଷି ବିଭାଗ ସମେତ ଅନେକ ଅନୁଷ୍ଠାନ ପକ୍ଷରୁ ବହୁବାର ସମ୍ମାନିତ ଓ ପୁରସ୍କୃତ କରାଯାଇଛି । ଚଳିତ ବର୍ଷ ଜିଲ୍ଲାରେ ଅନ୍ୟ କୌଣସି ବଗିଚାରେ ଆମ୍ବ ଦେଖିବାକୁ ମିଳେ ନାହିଁ । କିନ୍ତୁ ଯୋଗେଶ୍ବରଙ୍କ ବଗିଚାରେ ଏତେ ସଂଖ୍ୟାରେ ଆମ୍ବ ଫଳିଥିବାରୁ ବହୁ ସଂଖ୍ୟାରେ ଲୋକ ଦେଖିବାକୁ ଆସୁଛନ୍ତି । ଯୋଗେଶ୍ବର ଯେଉଁ ଗଛରେ ହାତ ଦେଉଛନ୍ତି ସେହି ଗଛ ଫୁଲଫଳରେ ଭରପୁର ହୋଇ ଯାଉଛି । ଏପରି ଚାଷ କରି ସେ ଅନ୍ୟ ମାନଙ୍କ ପାଇଁ ସାଜିଛନ୍ତି ପ୍ରେରଣାର ଉତ୍ସ ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
