ଅନୁଗୋଳ: ଟ୍ରାଫିକ ନିୟମ ନ ମାନିବା ହେଲା କାଳ । ଟ୍ରାଫିକ ପୋଷ୍ଟ ଅତିକ୍ରମ କରିବାବେଳେ ଚଢିଗଲା ଟ୍ରକ । ଘଟଣାସ୍ଥଳରେ ଜଣଙ୍କର ମୃତ୍ୟୁ । ଅନୁଗୋଳ ସହର ମଧ୍ୟ ଦେଇ ଜାତୀୟ ରାଜପଥ ୫୫ର ଥାନା ଛକଠାରେ ଘଟିଛି ଏହି ଦୁର୍ଘଟଣା । ମୃତକ ଜଣଙ୍କ ହେଲେ ପର୍ଶୁରାମ ରାଉତ ।
ସୂଚନା ଅନୁଯାୟୀ, ରବିବାର ସକାଳେ ପର୍ଶୁରାମ ଏକ ସ୍କୁଟି ଯୋଗେ ଅନୁଗୋଳ ହାଟରୁ ନିଜ ଘର ହୁଲୁରିସିଙ୍ଗାକୁ ଯାଉଥିବାବେଳେ ଟ୍ରାଫିକ ସିଗନାଲ ଥିଲା । ମାତ୍ର ପର୍ଶୁରାମ ସିଗନାଲକୁ ନ ମାନି ଯାଉଥିବାବେଳେ ଅପରପାର୍ଶ୍ବରୁ ଆସୁଥିବା ଏକ ଟ୍ରକ ତାଙ୍କ ଉପରେ ଚଢି ଯାଇଥିଲା । ତାଙ୍କୁ ଗୁରୁତର ଅବସ୍ଥାରେ ଅନୁଗୋଳ ଜିଲ୍ଲା ମୁଖ୍ୟ ଚିକିତ୍ସାଳୟ ନିଆଯାଉଥିବାବେଳେ ସେଠାରେ ତାଙ୍କର ମୃତ୍ୟୁ ହୋଇଛି ।
ଯାହାକୁ ନେଇ କିଛି ସମୟ ପାଇଁ ଥାନା ଛକରେ ଉତ୍ତେଜନା ଦେଖାଦେଇଛି । ବାରମ୍ବାର ସହର ଭିତରେ ଦୁର୍ଘଟଣା ଘଟୁଥିବାବେଳେ ପ୍ରଶାସନ ନିରବଦ୍ରଷ୍ଟା ସାଜିଥିବା ଲୋକ ଅଭିଯୋଗ କରିଛନ୍ତି । ଏଠାରେ ସୂଚନାଯୋଗ୍ୟ ଯେ ଗତ ଗୁରୁବାର ଦିନ ବୁଢୀ ଠାକୁରାଣୀ ଛକରେ ଟ୍ରକ ଚାପାରେ ମା ଓ ପୁଅଙ୍କ ମୃତ୍ୟୁ ହୋଇଥିଲା ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
