ଅନୁଗୋଳ: ଥମୁନି ଛାତ୍ର ସଂସଦ ନିର୍ବାଚନ ବାତିଲ ଅସନ୍ତୋଷ । ରାଜ୍ୟ ସରକାର ପୁଣି ଥରେ ସମସ୍ତ ମହାବିଦ୍ୟାଳୟ ଓ ବିଶ୍ବବିଦ୍ୟାଳୟରେ ଛାତ୍ର ସଂସଦ ନିର୍ବାଚନକୁ ବାତିଲ କରିଛନ୍ତି । ସରକାରଙ୍କ ଏହି ନିଷ୍ପତ୍ତିକୁ କଂଗ୍ରେସ ଓ ଏସୟୁସିଆଇ ପରେ ଏବେ ବିରୋଧ କରିଛି ଅନୁଗୋଳ ବିଜେପି ଯୁବ ମୋର୍ଚ୍ଚା ଓ ଏବିଭିପି । ଏନେଇ ଆଜି ଅନୁଗୋଳ ସରକାରୀ ମହାବିଦ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରି ଉଚ୍ଚ ଶିକ୍ଷା ମନ୍ତ୍ରୀଙ୍କ କୁଶପୁତ୍ତଳିକା ଦାହ କରିଥିଲେ ।
ଛାତ୍ର ସଂସଦ ନିର୍ବାଚନକୁ ବାତିଲ କରି ସରକାର ଛାତ୍ରଛାତ୍ରୀଙ୍କ ମୌଳିକ ଅଧିକାରକୁ କ୍ଷୁଣ୍ଣ କରୁଛନ୍ତି । ମହାବିଦ୍ୟାଳୟ ଓ ବିଶ୍ବବିଦ୍ୟାଳୟରେ ଛାତ୍ର ସଂସଦ ଦ୍ବାରା ବିଭିନ୍ନ ଉନ୍ନତିମୂଳକ କାର୍ଯ୍ୟ ହୋଇଥାଏ । ମାତ୍ର ଛାତ୍ର ସଂସଦ ବାତିଲ ହେଲେ କର୍ତ୍ତୃପକ୍ଷ ମନୋମୁଖୀ କାର୍ଯ୍ୟ କରିବେ । ଏପରିକି କଲେଜରେ କୌଣସି ଉନ୍ନୟନମୂଳକ କାର୍ଯ୍ୟ ହୋଇପାରିବ ନାହିଁ । ତେଣୁ ସରକାର ଏଭଳି ନିଷ୍ପତ୍ତିକୁ ତୁରନ୍ତ ବାତିଲ କରି ଛାତ୍ର ସଂସଦ ନିର୍ବାଚନ ଚାଲୁ ରଖିବାକୁ ବିଜେପି ଯୁବମୋର୍ଚ୍ଚା ଓ ଏବିଭିପି ନେତା ଦାବି କରିଛନ୍ତି । ନଚେତ ଆଗାମୀ ଦିନରେ ଜୋରଦାର ଆନ୍ଦୋଳନ କରିବାକୁ ଚେତାବନୀ ଦେଇଛନ୍ତି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
