ଅନୁଗୋଳ: ଧୀରେ ଧୀରେ ଓଡ଼ିଶାରେ କୋରୋନା ଆକ୍ରାନ୍ତଙ୍କ ସଂଖ୍ୟା ବଢି ଚାଲିଛି । ଯାହା ଏବେ ରାଜ୍ୟବାସୀଙ୍କ ପାଇଁ ଚିନ୍ତାର ବିଷୟ ପାଲଟିଛି । ତେବେ ଏନେଇ ପ୍ରଶାସନ ଅନେକ ଚେଷ୍ଟା କରୁଥିଲେ ମଧ୍ୟ କେଉଁଠି ନା କେଉଁଠି ଲୋକେ ଏହାକୁ ପାଳନନ କରିବା ଦେଖିବାକୁ ମିଳିଛି । ଏଭଳି ପରିସ୍ଥିତିରେ ମୁଖ୍ୟତଃ ସାମାଜିକ ଦୂରତା ବଜାୟ ରଖିବା ପାଇଁ ଅନୁଗୋଳ ଜିଲ୍ଲା ପ୍ରଶାସନ ଜନସାଧାରଣଙ୍କୁ ନିବେଦନ କରିଛନ୍ତି ।
ଲକ୍ ଡାଉନ୍ ସମୟରେ ଅତ୍ୟାବଶ୍ୟକ ସାମଗ୍ରୀ ଦୋକାନକୁ ଛାଡିଦେଲେ ବାକି ସମସ୍ତ ଦୋକାନ ବଜାରକୁ ପ୍ରଶାସନ ପକ୍ଷରୁ ବନ୍ଦ ରଖାଯାଇଛି । ଜରୁରୀ କାମ ନଥିଲେ ଘରୁ ନ ବାହାରିବାକୁ ଅନୁରୋଧ କରାଯାଉଛି । ଦୋକାନ, ବ୍ୟାଙ୍କ, ଡାକ୍ତରଖାନା ଆଦିରେ ସାମାଜିକ ଦୂରତା ରକ୍ଷା କରିବାକୁ ଚିହ୍ନ ଦିଆଯାଇଛି । କିନ୍ତୁ ସେ ସବୁ ଚିହ୍ନରେ ଛିଡା ନ ହୋଇ ଲୋକ ସାମାଜିକ ଦୁରତ୍ଵକୁ ମଧ୍ୟ ଉଲ୍ଲଘଂନ କରୁଛନ୍ତି । ଆଜି ଠାରୁ ଯେଉଁ ସବୁ ଦୋକାନ ଗୁଡିକରେ ସାମାଜିକ ଦୁରତ୍ଵ ରକ୍ଷା ଦିଗରେ ଦୃଷ୍ଟି ନ ଦେବେ ସେହି ଦୋକାନୀ ମାନଙ୍କ ଉପରେ ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଉଭୟ ଅନୁଗୋଳ ଜିଲ୍ଲାପାଳ ଓ ଏସପି ଏକ ଭିଡିଓ ବାର୍ତ୍ତା ଜାରି କରିଛନ୍ତି ।
ଲୋକ ଏ ସବୁ ନିର୍ଦ୍ଦେଶକୁ ବେଖାତିର କରୁଥିବା ନଜରକୁ ଆସିଛି । ବିନା କାମରେ ବାହାରେ ବୁଲୁଥିବା ଲୋକଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ନିଆଯିବ ବୋଲି ପ୍ରଶାସନ ପକ୍ଷରୁ ସୂଚନା ଦିଆ ଯାଇଛି । ଯଦି କୌଣସି ଜରୁରୀ କାମରେ ଘରୁ ବାହାରିବେ ତେବେ ମାସ୍କ ବାଧ୍ୟତା ମୂଳକ ଭାବେ ଲଗାଇବାକୁ ପଡିବ ବୋଲି ଜିଲ୍ଲାପାଳ ମନୋଜ ମହାନ୍ତି କହିଛନ୍ତି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
