ଅନୁଗୋଳ: ସହରରେ ପ୍ରାୟ 10 ଏକର ପରିମିତ ଜାଗା ଉପରେ ନିର୍ମାଣ ଚାଲିଛି ଅତ୍ୟାଧୁନିକ ବସ ଟର୍ମିନାଲ । ଯାହା ପାଇଁ ଖର୍ଚ୍ଚ ହେଉଛି ପ୍ରାୟ 58 କୋଟି ଟଙ୍କା । ରାଜ୍ୟରେ ପ୍ରଥମକରି ଅତ୍ୟାଧୁନିକ ସୁବିଧା ଥାଇ ଏହି ବସ ଟର୍ମିନାଲ ପିପିପି ମୋଡରେ ନିର୍ମାଣ କରାଯାଉଛି । ଏଠାରେ ଏକକାଳୀନ କୋଡିଏରୁ ଅଧିକ ବସ ରହିବା ସହ ଯାତ୍ରୀମାନଙ୍କ ପାଇଁ ରହିଛି ସମସ୍ତ ସୁବିଧା ସୁଯୋଗ ।
ଯାତ୍ରୀଙ୍କ ପାଇଁ ପ୍ରତୀକ୍ଷା ଗୃହ, ରେଷ୍ଟୁରାଣ୍ଟ, ରାତ୍ରିଯାପନର ବ୍ୟବସ୍ଥା ସହ କିଣାକିଣି ପାଇଁ ସପିଂମଲର ମଧ୍ୟ ବ୍ୟବସ୍ଥା ରହିଛି ଏହି ଟର୍ମିନାଲ ମଧ୍ୟରେ । ଯାହାକି ଓଡିଶାର ସବୁଠାରୁ ବଡ ଓ ଅତ୍ୟାଧୁନିକ ଟର୍ମିନାଲ ହେବ । ଖାଲିଯେ, ଯାତ୍ରୀମାନଙ୍କ ପାଇଁ ସମସ୍ତ ସୁବିଧା ସୁଯୋଗ ରହିଛି ତାହା ନୁହେଁ । ବସ ଡ୍ରାଇଭର ମାନଙ୍କ ପାଇଁ ରେଷ୍ଟରୁମ, ତେଲ ଟାଙ୍କି, ଗାଡି ମରାମତିର ସୁବିଧା, ପୋଲିସ ଷ୍ଟେସନ, ବସ ମାଲିକଙ୍କ ପାଇଁ ଘର ଆଦିର ବ୍ୟବସ୍ଥା ରହିଛି ।
ତେବେ ଏହି ବସ ଟର୍ମିନାଲ କାର୍ଯ୍ୟ ବିଳମ୍ବକୁ ନେଇ ଅନେକ ପ୍ରଶ୍ନ ଛିଡା ହୋଇଛି । 2012 ମସିହାରୁ ଏମଓୟୁ ହୋଇଥିବାବେଳେ କାର୍ଯ୍ୟ କିନ୍ତୁ ମନ୍ଥର ଗତିରେ ଚାଲିଛି । ଅନେକ ସମୟରେ ଏହାର ନିର୍ମାଣ କରୁଥିବା ମିଲନ ଡେଭଲପର ଓ ଅନ୍ୟ ସରକାରୀ ବିଭାଗ ମଧ୍ୟରେ ତାଳମେଳ ଅଭାବ କାରଣରୁ କାର୍ଯ୍ୟ ବିଳମ୍ବ ହେଉଥିବା ଅଭିଯୋଗ ସାମ୍ନାକୁ ଆସିଛି ।
ଏସବୁ ଭିତରେ ଏହି ଅତ୍ୟାଧୁନିକ ନିର୍ମାଣଧୀନ ବସ ଟର୍ମିନାଲର ସ୍ଥିତି ସମୀକ୍ଷା କରିଛନ୍ତି ଅନୁଗୋଳ ଜିଲ୍ଲାପାଳ ସିଦ୍ଧାର୍ଥ ଶଙ୍କର ସ୍ବାଇଁ । ସବୁ ବିଭଗ ଅଧିକାରୀ, ନିର୍ମାଣ କଯ୍ୟକରୁଥିବା ମିଲନ ଡେଭଲପରର କର୍ମଚାରୀଙ୍କୁ ଡାକି ମାର୍ଚ୍ଚ ମାସ ସୁଦ୍ଧା ଏହି ଟର୍ମିନାଲ କାର୍ଯ୍ୟକ୍ଷମ କରିବାକୁ ନିର୍ଦ୍ଦେଶ ଦେଇଥିବା ସୂଚନା ଦିଆଯାଇଛି।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
