ଅନୁଗୋଳ: କୋଇଲା ପରିବହନକୁ ନେଇ ତେଜିଛି ବିବାଦ । ସ୍ଥାନୀୟ ଲୋକଙ୍କ ବଦଳରେ ଅନ୍ୟ କମ୍ପାନୀର ଟ୍ରକରେ କୋଇଲା ପରିବହନକୁ ବିରୋଧ କରିଛି ଅନୁଗୋଳର ତାଳଚେର ଜଗନ୍ନାଥ ଟ୍ରକ ଓନର୍ସ ଆସୋସିଏସନ ।
ସଂଘର ଅଭିଯୋଗ ଅନୁସାରେ, କୋଇଲା ଖଣି ପାଇଁ ସେମାନେ ନିଜର ଜମି ହରାଇ ସର୍ବସ୍ବାନ୍ତ ହୋଇଛନ୍ତି । ଏପରି ସ୍ଥଳେ ସେମାନେ ଲୋନ କରି ଟ୍ରକ କିଣିବା ସହ ଏଥିରେ କୋଇଲା ପରିବହନ କରି ନିଜର ଗୁଜୁରାଣ ମେଣ୍ଟାଉଛନ୍ତି । ସେରାବାଲି ନାମକ ଅନ୍ୟ ଏକ ସଂସ୍ଥା ଆସି କୋଇଲା ପରିବହନ କରିବାକୁ ବସିଛି । ଯାହା ତାଙ୍କ ପେଟ ପାଟଣାକୁ ଲାତ ମାରିବା ଭଳି ହୋଇଛି ।
ଯଦି ଏପରି ହୁଏ ସେମାନେ ଆଉ କୋଇଲା ପରିବହନ କରିପାରିବେ ନାହିଁ । ଏହା ଯୋଗୁଁ ସେମାନେ ନିଜର ଜୀବିକା ହରାଇବେ । ଏହା ଯୋଗୁଁ କ୍ଷତି ସହିବେ ପ୍ରାୟ ୧୦୦ରୁ ଅଧିକ ଟ୍ରକ ମାଲିକ । ତୁରନ୍ତ ପ୍ରଶାସନ ସେମାନଙ୍କ ଦାବି ପ୍ରତି ନଜର ଦେବାକୁ ଏକ ସାମ୍ବାଦିକ ସମ୍ମିଳନୀରେ ଦାବି କରାଯାଇଛି । ଯଦି ସେରାବାଲି ଜୋର ଜବରଦସ୍ତ କୋଇଲା ପରିବହନ କରେ ତେବେ ତା’ର ପରିଣାମ ଜଗନ୍ନାଥ କୋଇଲା ଖଣିକୁ ଭୋଗିବାକୁ ପଡିବ ବୋଲି ସଂଘ ପକ୍ଷରୁ ଚେତାବନୀ ଦିଆଯାଇଛି ।
ଅନୁଗୋଳରୁ ରାଜେନ୍ଦ୍ର ପ୍ରସାଦ ମିଶ୍ର, ଇଟିଭି ଭାରତ
