ଅନୁଗୋଳ: ବଦଳି ପରେ ଅନୁଗୋଳରେ ଯୋଗ ଦେଲେ ଏସପି ଜଗମୋହନ ମିନା । ଦାୟିତ୍ବ ଗ୍ରହଣ ପରେ ଲୋକଙ୍କ ପାଇଁ 24 ଘଣ୍ଟା ଏସପିଙ୍କ ଦ୍ବାର ଖୋଲା ରହିବ ବୋଲି ସେ କହିଛନ୍ତି । ବିଦାୟ ଏସପି ମିତ୍ରଭାନୁ ମହାପାତ୍ରଙ୍କ ଠାରୁ ଏହି ଦାୟିତ୍ବ ସେ ଗ୍ରହଣ କରିଛନ୍ତି ।
ଅନୁଗୋଳ ଜିଲ୍ଲାର ଆଇନ ଶୃଙ୍ଖଳା ପରିସ୍ଥିତିକୁ ନଜର ରଖି ଆଇନ ପରିଧି ଭିତରେ ରହି ସେ ଲୋକଙ୍କୁ ନ୍ୟାୟ ଦେବାକୁ ଚେଷ୍ଟା କରିବେ ବୋଲି ସୂଚନା ଦେଇଛନ୍ତି । ଏହାଛଡା କିଭଳି ଅପରାଧୀଙ୍କୁ ଅଧିକରୁ ଅଧିକ ସଜା ହୋଇ ପାରିବ ଓ ତୁରନ୍ତ ତଦନ୍ତ ପ୍ରକ୍ରିୟା ଶେଷ ହେବ ତା ଉପରେ ସେ ଫୋକସ କରିବେ ବୋଲି ସୂଚନା ଦେଇଛନ୍ତି ।
ଟେକ୍ନୋଲୋଜିକୁ ବ୍ୟବହାର କରି ଅପରାଧୀ ରୋକିବା ଆଦି ଦିଗରେ ସେ କାମ କରବେ ବୋଲି କହିଛନ୍ତି । ୨୦୧୩ ବ୍ୟାଚ ଆଇପିଏସ ଅଫିସର ଜଗମୋହନ ମୀନା ଜଣେ ଲୋକପ୍ରିୟ ଏସପି ଭାବେ ମାଲକାନଗିରିରେ କାର୍ଯ୍ୟ କରିଥିଲେ । ଏଠାରେ ମଧ୍ୟ ସେଇ ଭରସା ବଜାଇ ରଖିବେ ବୋଲି କହିଛନ୍ତି ମୀନା ।
ଏସପିଙ୍କ ଯୋଗଦାନ ସମୟରେ ଜିଲ୍ଲାର ସମସ୍ତ ପୋଲିସ ଅଧିକାରୀ ସାମିଲ ହୋଇ ଥିଲେ । ଗତକାଲି ଜଗମୋହନ ମାଲକାନଗିରି ଛାଡିବା ସମୟରେ ମାଲକାନଗିରିରେ ଏକ ଭାବବିହ୍ଵଳ ପରିସ୍ଥିତି ଦେଖିବାକୁ ମିଳିଥିଲା ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ , ଇଟିଭି ଭାରତ
