ଅନୁଗୋଳ: ଜିଲ୍ଲା ପାଇଁ ଅଶୁଭ ସାଜିଛି ଶୁକ୍ରବାର । ଗୋଟିଏ ଦିନରେ ତିନି ତିନୋଟି ଦୁର୍ଘଟଣା ଘଟି ୪ଜଣଙ୍କ ଜୀବନ ଯାଇଛି । ପ୍ରଥମେ ଟ୍ରକ ସହ କାର, ପରେ ସ୍କୁଲ ଛାତ୍ରୀଙ୍କ ଉପରେ ମାଡିଗଲା ଟ୍ରକ ଏବଂ ପୁଣି ଏକ ଅଟୋ ସହିତ ଟ୍ରକ ଧକ୍କାରେ ଦୁଇ ଜଣଙ୍କ ମୃତ୍ୟୁ ହୋଇଛି ।
ଏହାସହ ଆଜି ଦିନ ତମାମ ଘଟିଥିବା ଦୁର୍ଘଟଣାରେ ୫ ଜଣ ମଧ୍ୟ ଗୁରୁତର ହୋଇଛନ୍ତି । ସନ୍ଧ୍ୟାରେ ଜିଲ୍ଲାର ସମଲ ଥାନା ୧୪୯ନଂ ଜାତୀୟ ରାଜପଥର ନାଇକାନାଳି ଠାରେ ଟ୍ରକ- ଅଟୋ ମୁହାଁମୁହିଁ ଧକ୍କା ହେବାରୁ ଘଟଣାସ୍ଥଳରେ ୨ ଜଣ ମହିଳା ମୃତ୍ୟୁବରଣ କରିଥିବା ବେଳେ ୪ ଜଣ ଗୁରୁତର ଭାବେ ଆହତ ହୋଇଛନ୍ତି ।
ମୃତକ ଦୁଇଜଣ ହେଲେ ଢେଙ୍କାନାଳ ଜିଲ୍ଲା ପର୍ଜଙ୍ଗ ଥାନା ବଡ଼ଝରା ଗାଁର ଶାନ୍ତି ବେହେରା ଓ କଣ୍ଢେଇଖୋଲ ଗାଁର ଗୋଲାପ ବେହେରା । ଗୁରୁତର ୪ ଜଣଙ୍କୁ ପ୍ରଥମେ ତାଳଚେର ଉପଖଣ୍ଡ ଡାକ୍ତରଖାନା ଓ ପରେ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି।
ଗୁରୁତରଙ୍କ ମଧ୍ୟରେ ଜଣେ ପୁରୁଷ , ଦୁଇ ମହିଳା ଓ ଜଣେ ଶିଶୁ ଅଛନ୍ତି l ତେବେ କେଉଁ ପରିସ୍ଥିତିରେ ଓ କିଭଳି ଦୁର୍ଘଟଣା ଘଟିଲା ତାହା ଜଣ ପଡିନଥିବା ବେଳେ ଘଟଣା ସ୍ଥଳରେ ଉତେଜନା ଥିବାରୁ ବ୍ୟପାକ ପୋଲିସ ମୁତୟନ କରାଯାଇଛି l ତେବେ ଅଟୋଟି କେଉଁଆଡ଼େ ଯାଉଥିଲା ତାହା ଜଣା ପଡ଼ିନାହିଁ ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
