ଅନୁଗୋଳ: ଭକ୍ତ ପ୍ରହଲ୍ଲାଦଙ୍କ ପାଇଁ ହୋଲିକା ରାକ୍ଷସୀର ଦହନ । ନିଜର ଭକ୍ତି ବଳରେ ରାକ୍ଷସ ଶକ୍ତିର ବିନାଶ ହୋଇଥିଲା । ପୁରାଣର ଏହି କଥା ବସ୍ତୁକୁ ଆଜି ବି ପାଳନ କରିଆସୁଛନ୍ତି ମାରୱାଡ଼ି ସମ୍ପ୍ରଦାୟର ଲୋକେ । ପବିତ୍ର ଦୋଳ ପୂର୍ଣ୍ଣିମା ଅବସରରେ ପାଳନ କରିଛନ୍ତି ହୋଲିକା ଦହନ ଉତ୍ସବ । ଯେଉଁଥିରେ ସାମିଲ ହୋଇଥିଲେ ମାରୱାଡି ସମ୍ପ୍ରଦାୟର ସବୁ ବର୍ଗର ଲୋକେ ।
ଅନୁଗୋଳ ମାରୱାଡ଼ି ସମାଜ ପକ୍ଷରୁ ପାଳନ ହୋଇଛି ହୋଲିକା ଦହନ ଉତ୍ସବ । ପୁରାଣରେ ବର୍ଣ୍ଣିତ କଥା ବସ୍ତୁ ବିଶ୍ବାସ ଆଧାରରେ ଯେଭଳି ନିଜର ସଚ୍ଚୋଟତା ଓ ଭକ୍ତି ପାଇଁ ଭକ୍ତ ପ୍ରହ୍ଲାଦଙ୍କ ନିକଟରେ ରାକ୍ଷସୀ ହୋଲିକାର ଦହନ ହୋଇଥିଲା । ଠିକ ସେଭଳି ଅସତ୍ୟ ଉପରେ ସତ୍ୟର ବିଜୟ ଉତ୍ସବ ସଦୃଶ ପାଳନ ହୋଇଛି ଏହି ହୋଲିକା ଦହନ । ଗୋବରରେ ତିଆରି ସ୍ବତନ୍ତ୍ର ବଡକୁଲ୍ଲକୁ ଦହନ କରି ବିଧି ଅନୁଯାୟୀ ପୂଜା ଅର୍ଚ୍ଚନା କରିବା ପରେ ଏମାନେ ପାଳନ କରିଥିଲେ ହୋଲି ଉତ୍ସବ।
ବିଳମ୍ବିତ ରାତ୍ରିରେ ମାରୱାଡି ସମ୍ପ୍ରଦାୟର ମହିଳା ଓ ପୁରୁଷ ଏକାଠି ହୋଇ ହୋଲିକା ଦହନ ପରେ ପାଳିଥିଲେ ରଙ୍ଗର ପର୍ବ ହୋଲି । ପରସ୍ପରକୁ ରଙ୍ଗ ଲଗାଇ ହୋଲିକା ଦହନର ବିଜୟ ଉତ୍ସବ ସଦୃଶ ହୋଲି ଖେଳରେ ମସଗୁଲ ହୋଇ ଯାଇଥିଲେ । ଏହାସହ ନୃତ୍ୟ ଓ ଗୀତର ମଧ୍ୟ କାର୍ଯ୍ୟକ୍ରମର ଆୟୋଜନ ହୋଇଥିଲା । ଯାହାର ଭରପୁର ମଜା ଉଠିଥିଲେ ଏହି ସମ୍ପ୍ରଦାୟର ଲୋକେ । ଅନୁଗୋଳ ମାରୱାଡ଼ି ଧର୍ମଶାଳାରେ ଏହି ସମସ୍ତ କାର୍ଯ୍ୟକ୍ରମର ଆୟୋଜନ ହୋଇଥିଲା ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
