ଅନୁଗୋଳ: ଜିଲ୍ଲାର ବିଭିନ୍ନ ସ୍ଥାନରେ ଲଗାଣ ବର୍ଷା ଯୋଗୁଁ ନାହିଁ ନଥିବା ପରିସ୍ଥିତି ସୃଷ୍ଟି ହୋଇଛି । ଜନଜୀବନ ଅସ୍ତବ୍ୟସ୍ତ ହୋଇ ପଡିଛି । ଗତକାଲି ଅନୁଗୋଳରେ ହାରାହାରି 86 ମିଲି ମିଟର ବର୍ଷା ହୋଇଥିବା ବେଳେ ଆଜି 44 ମିଲିମିଟର ବର୍ଷା ରେକର୍ଡ କରାଯାଇଛି। ତେଣୁ ରାସ୍ତାଘାଟ ପାଣିରେ ଭର୍ତ୍ତି ହୋଇ ରହିଛି ।
ଲଗାଣ ବର୍ଷା ସବୁଠାରୁ ଅଧିକ କଣିହାଁ ବ୍ଲକରେ ରେକର୍ଡ କରାଯାଇଛି। ଆଜି ସକାଳୁ ମଧ୍ୟାହ୍ନ ପର୍ଯ୍ୟନ୍ତ କଣିହାଁ ବ୍ଲକରେ 64 ମିଲିମିଟର ବର୍ଷା ହୋଇଛି। ଆହୁରି ଝିପି ଝିପି ବର୍ଷା ଲାଗି ରହିଛି । ବର୍ଷା ପ୍ରଭାବରେ କଣିହାଁ ବଜ୍ରକୋଟ ରାସ୍ତା ଉପରେ ପ୍ରାୟ 3ଫୁଟ ପାଣି ଚାଲୁଛି ।
ବଜ୍ରକୋଟ ଓ ଝରାବେରେନି ଗାଁ ଭିତରେ ପାଣି ପଶିଯାଇଛି। କିଛି ଘର ଭିତରେ ମଧ୍ୟ ପାଣି ପଶି ଯାଇଥିବା ନଜିର ରହିଛି। ଲୋକେ ନିଜେ ନାଳ ଖୋଲି ବର୍ଷା ଜଳ ନିଷ୍କାସନ କରୁଥିବା ଦେଖିବାକୁ ମିଳିଛି। ଆହୁରି 2 ଦିନ ପ୍ରବଳ ବର୍ଷା ସମ୍ଭାବନା ଥିବାରୁ ଆଗକୁ ଅସୁବିଧା ହୋଇପାରେ ବୋଲି ଆଶଙ୍କା କରାଯାଇଛି।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
