ଅନୁଗୋଳ: ସାତକୋଶିଆ ବ୍ୟାଘ୍ର ପ୍ରକଳ୍ପକୁ ପୁନଃର୍ଜିବୀତ କରିବାକୁ ପୁଣି ଥରେ ତତ୍ପର ହୋଇଛି ବନ ବିଭାଗ ଓ ଏନଟିସିଏ । ଏନେଇ ଅଭୟାରଣ୍ୟ ମଧ୍ୟରେ ଥିବା ୮ ରୁ ଅଧିକ ଗାଁ ର ୧୫ ଜଣଙ୍କୁ ଉତ୍ତରପ୍ରଦେଶର ପିଲିଭିତ ଏବଂ ଉତ୍ତରାଖଣ୍ଡର କୋରବେଟ ବ୍ୟାଘ୍ର ପ୍ରକଳ୍ପ ବୁଲାଇ ନିଆଯାଇଛି ।
ସେପ୍ଟମ୍ବର 24 ରୁ 27 ତାରିଖ ପର୍ଯ୍ୟନ୍ତ ସେମାନେ ବ୍ୟାଘ୍ର ପ୍ରକଳ୍ପ ବୁଲି ଦେଖିବା ସହ ସେଠାକାର ଅଧିବାସୀଙ୍କ ସହ ମିଶିଥିଲେ । ପ୍ରକଳ୍ପ ଯୋଗୁଁ ପର୍ଯ୍ୟଟନର ବିକାଶ ସାଙ୍ଗକୁ ସ୍ଥାନୀୟ ବାସିନ୍ଦାଙ୍କ ଆର୍ଥିକ ବିକାଶ ଘଟିଛି ସେ ସମ୍ପର୍କରେ ବୁଝିଛନ୍ତି । ସାତକୋଶିଆରେ ବ୍ୟାଘ୍ର ପ୍ରକଳ୍ପ ହେଲେ ଏଠାରେ ମଧ୍ୟ ସେଭଳି ବିକାଶ ହୋଇପାରିବ ବୋଲି କହିଛନ୍ତି ସାତକୋଶିଆ କ୍ଷେତ୍ର ନିର୍ଦ୍ଦେଶକ ।
ସେପଟେ ସ୍ଥାନୀୟ ବାସିନ୍ଦାଙ୍କ କହିବା କଥା ସେମାନେ ବ୍ୟାଘ୍ର ପ୍ରକଳ୍ପକୁ ବିରୋଧ କରୁ ନାହାଁନ୍ତି । ମାତ୍ର ଏନଟିସିଏର ଗାଇଡ଼ ଲାଇନ ଅନୁସାରେ ବ୍ୟାଘ୍ର ପ୍ରକଳ୍ପର ସଫଳତା ପାଇଁ ସ୍ଥାନୀୟ ବାସିନ୍ଦା, ବନ୍ୟଜନ୍ତୁ ପ୍ରେମୀ, ବିଭିନ୍ନ ସ୍ବେଚ୍ଛାସେବୀ ସଙ୍ଗଠନ ଓ ପୁରୁଖା ଲୋକଙ୍କୁ ସାମିଲ କରିବା କଥା । କିନ୍ତୁ ପ୍ରଥମରୁ ହିଁ ଦାୟିତ୍ବରେ ଥିବା ଅଧିକାରୀମାନେ ଏହି ଗାଇଡ଼ ଲାଇନକୁ ଅଣଦେଖା କରିଆସୁଛନ୍ତି । ଏଥିରେ ପରିବର୍ତ୍ତନ ଆବଶ୍ୟକ । ନଚେତ ବ୍ୟାଘ୍ର ପ୍ରକଳ୍ପ ହେବାକୁ ଦିଆଯିବ ନାହିଁ ବୋଲି ସାତକୋଶିଆ ପ୍ରଜା ସୁରକ୍ଷା ସମିତି ଚେତାବନୀ ଦେଇଛି ।
ସୂଚନାନୁଯାୟୀ, ଗତ ୨୦୧୮ ଜୁନରେ ମଧ୍ୟପ୍ରଦେଶର କାହ୍ନା ବ୍ୟାଘ୍ର ପ୍ରକଳ୍ପରୁ ଏକ ମହାବଳ ସାତକୋଶିଆକୁ ଅଣାଯାଇଥିଲା । ହେଲେ ସେହି ବର୍ଷ ନଭେମ୍ବର ୧୪ରେ ତାର ମୃତ୍ୟୁ ହେଲା । ସେହିପରି ୨୦୧୮ ଜୁଲାଇ ୨୮ରେ ବାନ୍ଧବଗଡ଼ରୁ ଏକ ବାଘୁଣୀ ମଧ୍ୟ ଅଣା ଯାଇଥିଲା । କିନ୍ତୁ ଦୁଇ ଦୁଇଟି ମଣିଷ ମାରିବା ଅଭିଯୋଗ ପରେ ତାକୁ ୨୦୧୮ ନଭେମ୍ବର ୭ ତାରିଖ ଠାରୁ ଆଜି ପର୍ଯ୍ୟନ୍ତ ଏନକ୍ଳୋଜର ଭିତରେ ବନ୍ଦୀ କରି ରଖାଯାଇଛି । ଫଳରେ ଦୁଇ ଦୁଇଟି ମଣିଷ ଜୀବନ ଯାଇଥିବାରୁ ସାତକୋଶିଆ ବ୍ୟାଘ୍ର ପ୍ରକଳ୍ପରେ ସ୍ଥାନୀୟ ଅଧିବାସୀ ପ୍ରକଳ୍ପକୁ ବିରୋଧ କରି ଆସୁଛନ୍ତି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
