ଅନୁଗୋଳ: ପାଞ୍ଚ ଦିନ ହେବ ପାଣି ଭିତରେ 40 ପରିବାର । ଶୁଣିବାକୁ କେହି ନାହିଁ । ଅନୁଗୋଳ ଜିଲ୍ଲା ତାଳଚେର ବ୍ଲକ କଙ୍କିଳି ଗାଁର 40 ପରିବାର ଭୋଗୁଛନ୍ତି ଦୁର୍ଦ୍ଦଶା। ଏ ଭଳି ସମୟରେ ଏମାନଙ୍କ ପାଖରେ କେହିନାହାଁନ୍ତି ।
ଗତ ୫ଦିନ ହେଲା ଲଗାଣ ବର୍ଷାରେ ଅନୁଗୋଳ ତାଳଚେର ବ୍ଲକ କଂକିଳି ଗ୍ରାମର ୧୨ନଂ ୱାର୍ଡ ଜଳମଗ୍ନ ହୋଇରହିଛି l ଏହି ୱାର୍ଡ଼ର ୪୦ ଗୋଟି ପରିବାର ଜଳଘେରରେ ରହିଛନ୍ତି । ଘର ଭିତରେ ବାହାରେ ଖାଲି ପାଣି ହିଁ ପାଣି l ଘରର ସବୁ ଆସବାବପତ୍ର ସମେତ ବହୁ ଗୁରୁତ୍ବପୂର୍ଣ୍ଣ ଜିନିଷପତ୍ର ଜଳରେ ନଷ୍ଟ ହୋଇଯାଇଛି । ରହିବା ବସିବା ତ ଦୂରର କଥା ଲୋକେ ରୋଷେଇ ମୁଠାଏ ମଧ୍ୟ କରି ପାରୁନାହାନ୍ତି । ବର୍ଷା ଜଳ ନିଷ୍କାସନ ହୋଇ ପାରୁ ନଥିବା ଯୋଗୁଁ ଜଳ ଘରେ ପଶୁଛି । ପ୍ରଶାସନକୁ ଗ୍ରାମବାସୀ ଅଭିଯୋଗ କଲେ ମଧ୍ୟ ସୁଫଳ ମିଳୁନି । ଵରଂ ଦିନକୁ ଦିନ ଅବସ୍ଥା ସାଙ୍ଘାତିକ ହେବାକୁ ଲାଗିଛି । ଯଥା ଶୀଘ୍ର ଏହି ପରିବାରଙ୍କୁ ସରକାରୀ ସୁବିଧା ସୁଯୋଗ ଯୋଗାଇବା ସହ ଜଳ ନିଷ୍କାସନ କରିବା ପାଇଁ ଗ୍ରାମବାସୀଙ୍କ ପକ୍ଷରୁ ଦାବୀ କରାଯାଇଛି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ,ଇଟିଭି ଭାରତ
