ଅନୁଗୋଳ: ଲଗାଣ ବର୍ଷା ଯୋଗୁଁ ମହାନଦୀରେ ସୃଷ୍ଟି ହୋଇଛି ବନ୍ୟା ପରିସ୍ଥିତି । ଅନୁଗୋଳର ସାତକୋଶିଆ ଗଣ୍ଡରେ ନାହିଁ ନଥିବା ସମସ୍ୟା ଭୋଗୁଛନ୍ତି ଅଞ୍ଚଳବାସୀ । ଗତ ବୁଧବାର ବିଳମ୍ବିତ ରାତିରେ ହଠାତ ଗଣ୍ଡରେ ପାଣି ବଢି ଯାଇଥିଲା । ଫଳରେ ନଦୀ କୂଳରେ ଥିବା ମତ୍ସ୍ୟଜୀବୀ ବସ୍ତିକୁ ପାଣି ମାଡ଼ି ଆସିଥିଲା । ଘରେ ପ୍ରାୟ ୧୫୦ ପରିବାରର ସଦସ୍ୟମାନେ ଶୋଇଥିଲେ । କିନ୍ତୁ ପୂର୍ବରୁ ସେଠାରେ ପ୍ରସ୍ତୁତ ହୋଇ ରହିଥିବା ପ୍ରଶାସନିକ ଅଧିକାରୀମାନେ ତୁରନ୍ତ ସେମାନଙ୍କୁ ଡ଼ଙ୍ଗା ସାହାଯ୍ୟରେ ସ୍ଥାନାନ୍ତର କରିଥିଲେ । ତେବେ ମତ୍ସ୍ୟଜୀବୀ ପରିବାରଗୁଡ଼ିକର ବହୁ ଘରକରଣା ଜିନିଷ ରହି ଯାଇଥିଲା । ଘରେ ଥିବା ସମସ୍ତ ଆସବାବପତ୍ର ନଷ୍ଟ ହୋଇଯାଇଥିବା ଜଣାପଡ଼ିଛି ।
ଗୁରୁବାରଠାରୁ ଟିକରପଡା ହାଇସ୍କୁଲରେ ୨୭୫ ଜଣଙ୍କୁ ରଖାଯାଇଛି । ସେମାନଙ୍କୁ ପ୍ରଥମେ ରିଲିଫ୍ ଆକାରରେ ଚୁଡ଼ା ଗୁଡ଼ ଦିଆଯାଇଥିଲା । ଏହାପରେ ସମସ୍ତଙ୍କ ପାଇଁ ରନ୍ଧାଖାଦ୍ୟ ବ୍ୟବସ୍ଥା କରାଯାଇଥିବା ଜଣା ପଡ଼ିଛି । ଏନେଇ ସ୍ଥାନୀୟ ସରପଞ୍ଚ, ଅନୁଗୋଳ ବିଡିଓ ଏବଂ ଅନ୍ୟ କର୍ମଚାରୀମାନେ ଉପସ୍ଥିତ ରହି ସ୍ଥିତି ତଦାରଖ କରୁଥିବା ଜଣାପଡ଼ିଛି । ମହାନଦୀ ସାତକୋଶିଆ ଗଣ୍ଡରେ ପ୍ରବଳ ପାଣି ଯୋଗୁଁ ଟିକରପଡ଼ା ରାସ୍ତା ଉପରେ ୧୦ଫୁଟର ପାଣି ଜମି ରହିଛି । ଏହାସହ ଟିକରପଡ଼ା ନେଚର କ୍ୟାମ୍ପ୍ ଚାରିପଟେ ପାଣି ରହିଥିବାରୁ କ୍ୟାମ୍ପ ବନ୍ଦ ରଖାଯାଇଛି ।
ସେଠାରେ ଥିବା ବିଦ୍ୟୁତ ଖୁଣ୍ଟଗୁଡିକ ଅର୍ଦ୍ଧାଧିକ ବୁଡ଼ିଯାଇଛି । ପ୍ରାଥମିକ ସ୍ୱାସ୍ଥ୍ୟକେନ୍ଦ୍ର ମଧ୍ୟ ବୁଡ଼ି ଯାଇଥିବା ଜଣାପଡିଛି । ଏପରିକି ନଳକୂପ, ବୋରୱେଲ୍ ସବୁ କିଛି ପାଣିରେ ବୁଡ଼ି ଯାଇଛି। ଅଧିକାଂଶ ବଡ଼ବଡ଼ ଗଛ ମଧ୍ୟ ଦେଖାଯାଉନାହିଁ । ବନ୍ୟା ଯୋଗୁଁ ଟିକରପଡା ବାସିନ୍ଦା ସମ୍ପୂର୍ଣ୍ଣ ଜଳ ବନ୍ଦୀ ହୋଇ ରହିଛନ୍ତି । ଟିକରପଡ଼ାର ପ୍ରାୟ ୨୭୫ଜଣ ମତ୍ସ୍ୟଜୀବୀଙ୍କୁ ଉଚ୍ଚ ସ୍ଥାନକୁ ସ୍ଥାନାନ୍ତର କରାଯାଇଛି । ବନ୍ୟା ମୁକାବିଲା ପାଇଁ ପ୍ରଶାସନ ସଜାଗ ରହିଛି ।
