ଅନୁଗୋଳ: ଟିକିଏ ଭଲ କରି ଦେଖନ୍ତୁ ଏହି ଦୃଶ୍ୟ । କିପରି ପୋଲଟି ଭାଙ୍ଗି ପଡିଛି । ଆଉ ଅସୁବିଧାରେ ଯାତାୟାତ କରୁଛନ୍ତି ସ୍ଥାନୀୟ ଲୋକେ । କୌଣସି ଦୂର୍ବିପାକ ନୁହେଁ ବରଂ ନୂଆ ପୋଲ ନିର୍ମାଣ ହେବ ବୋଲି ଠିକାଦାର ଏହି ପୋଲକୁ ଭାଙ୍ଗି ଦେଇଛନ୍ତି । କିନ୍ତୁ ନୂଆ ପୋଲ ତ ଦୂରର କଥା ପୁରୁଣା ପୋଲକୁ ନେଇ ନାନା ସମସ୍ୟା ଭୋଗୁଛନ୍ତି ଲୋକେ ।
ଅନୁଗୋଳ ବ୍ଲକର ଖିଣ୍ଡା ପଞ୍ଚାୟତ ଦେଇ ବହି ଯାଇଛି ରୁକୁଣା ନାଳ । ଏହି ନାଳ ଉପରେ ଅନେକ ଦିନ ପୂର୍ବରୁ ପାଇପ ପକାଯାଇ ଏକ ପୋଲ ନିର୍ମାଣ କରାଯାଇଥିଲା । ଆଉ ଏହା ଉପରେ ନିର୍ଭର କରୁଥିଲେ 5ଟି ପଞ୍ଚାୟତର ଲୋକେ ।
ବର୍ଷା ଦିନେ ପୋଲଟି ବୁଡି ଯାଉଥିବାରୁ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ଏକ ନୂଆ ପୋଲ ନିର୍ମାଣ ପାଇଁ ୫୨ ଲକ୍ଷ ଟଙ୍କା ବ୍ୟୟ ବରାଦ ହୋଇଥିଲା । କିଏ କାମ କରିବ ତା ମଧ୍ୟ ଧାର୍ଯ୍ୟ ହୋଇ କାର୍ଯ୍ୟାଦେଶ ମିଳିଥିଲା । ହେଲେ ନିର୍ମାଣ କାମ ନେଇଥିବା ଠିକାଦାର ପୁରଣା ପୋଲ ଭାଙ୍ଗି ଫେରାର ହୋଇଯାଇଛି ।
ପୁରୁଣା ପୋଲ ଭାଙ୍ଗିବା ଘଟଣାକୁ ଦୁଇ ବର୍ଷ ବିତି ଗଲାଣି । ଆଉ ଦୁଇ ବର୍ଷ ହେବ ଯାତାୟାତକୁ ନେଇ ଘାଣ୍ଟି ହେଉଛନ୍ତି ଖିଣ୍ଡା, ଜାମୁଣ୍ଡା, ତରାସ, ଗଡତରାସ ଏହିଭଳି 5ଟି ପଞ୍ଚାୟତ ଲୋକେ ।
ସେହିପରି ପିଲାମାନେ ନା ସ୍କୁଲ ଯାଇ ପାରୁଛନ୍ତି ନା ଲୋକେ ହସ୍ପିଟାଲ । ସାଧାରଣ କାମ ଟିଏ ପାଇଁ ଲୋକଙ୍କୁ ୫ ରୁ ୬ଟି ରାସ୍ତା ବୁଲି ବୁଲି ଯିବାକୁ ପଡୁଛି । ଏପଟେ ଲୋକଙ୍କ ଅସୁବିଧା ଓ ଠିକାଦାର କରିଥିବା ଅବ୍ୟବସ୍ଥାକୁ ସ୍ଵୀକାର କରିଛନ୍ତି ବିଭାଗୀୟ ଯନ୍ତ୍ରୀ । ଖୁବ ଶୀଘ୍ର କମ ଆରମ୍ଭ କରାଯିବ ବୋଲି ସୂଚନା ମଧ୍ୟ ଦେଇଛନ୍ତି ।
ଲୋକଙ୍କୁ ଭୁଆଁ ଓ ବିଭାଗକୁ ଚକମା ଦେଇ ଠିକାଦାର ଛୁ ମାରିଛି । ଏବେ ଦେଖିବାର କଥା ବିଭାଗ ଏହି ପୋଲର ନିର୍ମାଣ ପାଇଁ ଦେଇଥିବା ପ୍ରତିଶ୍ରୁତିକୁ କେବେ କାର୍ଯ୍ୟକାରୀ କରୁଛି ?
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
