ଅନୁଗୋଳ: ଜିଲ୍ଲାରେ ଥିବା NTPC ଓ TTPS କାରଖାନାରେ ସ୍ଥାୟୀ ନିଯୁକ୍ତି ଦାବିରେ ଆମରଣ ଅନଶନରେ ବସିଛନ୍ତି ୬୫ କ୍ଷତିଗ୍ରସ୍ତ ପରିବାରର ସଦସ୍ୟ । କାରଖାନା ଯୋଗୁଁ ଏହି ପରିବାର ଗୁଡିକ ସେମାନଙ୍କର ଭିଟାମାଟି ହରାଇଥିଲେ । ନିୟମ ଅନୁଯାୟୀ ପରିବାରର ଜଣଙ୍କୁ କାରାଖାନାର ଚାକିରୀ ଦେବା କଥା । ତେବେ କାରାଖାନା କର୍ତ୍ତୃପକ୍ଷ ତାହା କରାଇ ଦେଉନାହାନ୍ତି । ଏହାକୁ ନେଇ ବାରମ୍ବାର ଅଭିଯୋଗ କଲେ ସୁଦ୍ଧା କିଛି ଲାଭ ହେଉନାହିଁ ।
ଶେଷରେ ବାଧ୍ୟ ହୋଇ ଆଜି ଆମରଣ ଅନଶନରେ ବସିଛନ୍ତି ୬୫ କ୍ଷତିଗ୍ରସ୍ତ ପରିବାରର ସଦସ୍ୟ । ସକାଳ ୭ଟାରୁ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଅନଶନରେ ବସିଛନ୍ତି ଏହି କ୍ଷତିଗ୍ରସ୍ତ ପରିବାର । ଏହାପୂର୍ବରୁ ଏପ୍ରିଲ୍ ୫ ତାରିଖରେ ନିଯୁକ୍ତି ଦାବିରେ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିଥିଲେ । ସେହି ସମୟରେ ପ୍ରଶାସନ ୭ ଦିନ ମଧ୍ୟରେ ସମସ୍ୟାର ସମାଧାନ କରିବାକୁ ପ୍ରତିଶ୍ରୁତି ଦେଇଥିଲା ।
ଏହାରି ମଧ୍ୟରେ ୧୫ ଦିନ ବିତି ଯାଇଥିଲେ ସୁଦ୍ଧା କ୍ଷତିଗ୍ରସ୍ତଙ୍କ ସହ କୌଣସି ଆଲୋଚନା ହୋଇନାହିଁ। ତେଣୁ ବାଧ୍ୟ ହୋଇ ସେମାନେ ପୁଣି ଥରେ ଆଜିଠାରୁ ଅନଶନରେ ବସିଛନ୍ତି।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
