ଅନୁଗୋଳ: କୋରୋନା ମୁକାବିଲା ପାଇଁ ସରକାର ଯେତିକି ଚିନ୍ତିତ ଲୋକେ ମଧ୍ୟ ସେତିକି ତତ୍ପର । ଅନେକ ସାଧାରଣ ଲୋକ ପରୋକ୍ଷ ଓ ପ୍ରତ୍ୟକ୍ଷ ଭାବେ ଏହି ଲଢେଇରେ ସାମିଲ ହୋଇଛନ୍ତି । ଏଭଳି କିଛି ଦେଖିବାକୁ ମିଳିଛି ଅନୁଗୋଳରେ ।
ଜିଲ୍ଲାର ଆଠମଲ୍ଲିକ ଉପଖଣ୍ଡ ଜଙ୍ଗଲ ପାହାଡ଼ ଘେରା ତୁରୁଡା ଗାଁର ଗ୍ରାମବାସୀ ନିଜ ନିଜ ମଧ୍ୟରେ ସଚେତନ ହୋଇ କିଛି କିଛି ଅର୍ଥ ସଂଗ୍ରହ କରି 19ହଜାର 500ଟଙ୍କା ମୁଖ୍ୟମନ୍ତ୍ରୀ ରିଲିଫ ପାଣ୍ଠିକୁ ପ୍ରଦାନ କରିଛନ୍ତି । ଗ୍ରାମବାସୀଙ୍କ ପକ୍ଷରୁ ଆଠମଲ୍ଲିକ ବିଧାୟକ ରମେଶ ଚନ୍ଦ୍ର ସାଏଙ୍କୁ ଏହି ଅର୍ଥ ପ୍ରଦାନ କରାଯାଇଛି ।
ଗାଁରେ ପ୍ରାୟ 100ରୁ ଅଧିକ ପରିବାର ବସ ବାସ କରନ୍ତି । ଲୋକଙ୍କର ଆର୍ଥିକ ଅବସ୍ଥା ସେତେଟା ଭଲ ନୁହେଁ । ସେହି ଅଭାବ ଭିତରେ ମଧ୍ୟ କୋରୋନା ମୁକାବିଲା ପାଇଁ ସେମାନେ ଅଣ୍ଟା ଭିଡିଛନ୍ତି । ନିଜ ପେଟ କାଟି କଷ୍ଟ ଅର୍ଜିତ ଅର୍ଥରୁ କିଛିକିଛି ଦାନ କରି ଉଦାହରଣ ସୃଷ୍ଟି କରିପାରିଛନ୍ତି । ଗାଁର ଯୁବ ଗୋଷ୍ଠୀ ଘରଘର ବୁଲି ସହାୟତା ରାଶି ସଂଗ୍ରହ କରିଛନ୍ତି । ଲୋକେ ମଧ୍ୟ ଖୁସିରେ ଯିଏ ଯେତିକି ପାରିଲା ସହାୟତା କରିଛନ୍ତି । ଗ୍ରାମବାସୀଙ୍କ ଏହି କାର୍ଯ୍ୟକୁ ବିଧାୟକ ଖୁବ ପ୍ରଶଂସା କରିଛନ୍ତି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
