ଅନୁଗୋଳ: କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀଙ୍କୁ ପ୍ରବର୍ତ୍ତନ ନିର୍ଦ୍ଦେଶାଳୟ(ED) ଉଦ୍ଦେଶ୍ୟମୂଳକ ଭାବେ ହଇରାଣ କରୁଥିବା ଅଭିଯୋଗରେ ଆଜି ଅନୁଗୋଳ ଜିଲ୍ଲା କଂଗ୍ରେସ ପକ୍ଷରୁ ପ୍ରତିବାଦ । ତହସିଲଦାରଙ୍କ କାର୍ଯ୍ୟାଳୟ ଆଗରେ ଧାରଣା ଦେଇଛନ୍ତି ଜିଲ୍ଲା କଂଗ୍ରେସକର୍ମୀ । ଜିଲ୍ଲା କଂଗ୍ରେସ ସଭାପତି ବିପ୍ଳବ ଜେନାଙ୍କ ନେତୃତ୍ୱରେ ଶତାଧିକ କଂଗ୍ରେସ କର୍ମୀ କେନ୍ଦ୍ର ସରକାରଙ୍କ ବିରୋଧରେ ନାରାବାଜି କରିଛନ୍ତି । କେନ୍ଦ୍ର ସରକାର କଂଗ୍ରେସକୁ ଭୟ କରୁଛି । ଆଗକୁ ନିର୍ବାଚନ ଥିବାରୁ କଂଗ୍ରେସକୁ ଜାଣି ଶୁଣି ଆକ୍ରୋଶମୂଳକ ଭାବେ ଅଡୁଆରେ ପକାଯାଉଛି ବୋଲି ଅଭିଯୋଗ କରିଛନ୍ତି କଂଗ୍ରେସ ନେତା ।
ସୋନିଆଙ୍କୁ ED ଜେରା ନେଇ ଅନୁଗୋଳ କଂଗ୍ରେସର ବିକ୍ଷୋଭ
ଦେଶରେ ଦର ଦାମ ବୃଦ୍ଧି, ବେକାରୀ ଓ ଅନ୍ୟାନ୍ୟ ଗୁରୁତର ସମସ୍ୟା ଥିବାବେଳେ କେନ୍ଦ୍ର ସରକାର ସେଥିପ୍ରତି ଧ୍ୟାନ ନଦେଇ କଂଗ୍ରେସ ପଛରେ ଲାଗିଛି । କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀଙ୍କୁ ପୁଣି ଥରେ ED ଜେରା କଲେ କଂଗ୍ରେସର ଆନ୍ଦୋଳନ ଜାରି ରହିବ ବୋଲି ଚେତାବନୀ ଦେଇଛନ୍ତି ।
ଇଟିଭି ଭାରତ, ଅନୁଗୋଳ
