ଅନୁଗୋଳ: ଋଣ ପରିଶୋଧ କଲା ପରେ ପୁଣି ଋଣ ଅର୍ଥ ପୈଠ କରିବା ନେଇ ଫୋନ ଆସିଛି । ଏଭଳି ଅଭିଯୋଗ ଆଣିଛନ୍ତି ଗୋଟିଏ କି ଦୁଇଟି ନୁହେଁ 9ଟି ମହିଳା ସ୍ଵୟଂ ସହାୟକ ଗୋଷ୍ଠୀର ସଦସ୍ୟ । ଏସବୁ ଘଟଣା ପାଇଁ ସଭିଏଁ ଦାୟୀ କରିଛନ୍ତି, ସେମାନଙ୍କ ଠାରୁ ଋଣ ଅର୍ଥ ଆଦାୟ କରିଥିବା ତଥା ବ୍ଲକ ଅଧୀନରେ କାର୍ଯ୍ୟ କରୁଥିବା ସିଆରପି ଜ୍ୟୋତ୍ସ୍ନାମୟୀ ପ୍ରଧାନଙ୍କୁ ।
ଏନେଇ ପ୍ରଥମେ ‘ଇଟିଭି ଭାରତ’ରେ ଖବର ପ୍ରସାରଣ ହୋଇଥିଲା । ଘଟଣା ସମ୍ପର୍କରେ ଜାଣିବା ପରେ ସିଆରପି କେଉଁ ଆଡେ ଫେରାର ହୋଇ ଯାଇଥିବା ଜଣାପଡିଛି ।
ତେବେ ଘଟଣାର ସମାଧାନ ସହ ଅଭିଯୁକ୍ତ ସିଆରପିଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଦାବି କରି ଦୀର୍ଘ ସମୟ ଧରି ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଶତାଧିକ ମହିଳା ବସି ରହିଥିଲେ । ସୂଚନା ଅନୁଯାୟୀ ମହିଳା ମାନେ ଅନୁଗୋଳ ବ୍ଲକ ଟାଇଁସି ପଞ୍ଚାୟତ ଭଗତପୁର ଗାଁର ବୋଲି ଜଣାପଡି଼ଛି । ଦୁଇ ବର୍ଷ ତଳେ ପ୍ରାୟ 9ଟି ସ୍ବୟଂ ସହାୟକ ଗୋଷ୍ଠୀର ସଦସ୍ୟଙ୍କୁ ତୃପ୍ତି ଯୋଜନାରେ ବ୍ୟାଙ୍କରୁ ଋଣ କରାଇଦେବାକୁ କହିଥିଲେ ସିଆରପି ଜ୍ୟୋତ୍ସ୍ନାମୟୀ । ସମ୍ପୃକ୍ତ ମହିଳା ସଙ୍ଘ ସଦସ୍ୟ ମାନେ ପ୍ରାୟ 50 ହଜାରରୁ 1 ଲକ୍ଷ ପର୍ଯ୍ୟନ୍ତ ଋଣ ମଧ୍ୟ ପାଇଥିଲେ । ଖାଲି ଏତିକି ନୁହେଁ ନିର୍ଦ୍ଦିଷ୍ଟ ସମୟ ସୀମା ମଧ୍ୟରେ ଋଣ ଅର୍ଥ ପରିଶୋଧ ମଧ୍ୟ କରି ନେଇଥିଲେ ସିଆରପି ।
ତେବେ ଆଦାୟ ଅର୍ଥ ସରକାରୀ ତହବିଲରେ ଜମା ନ କରି ସବୁ ହଡପ କରି ନେଇଥିବା ଅଭିଯୋଗ ହୋଇଛି । ଆଉ ଏହି ଘଟଣା ଲୋକଲୋଚନକୁ ଆସିବା ପରଠାରୁ ସମ୍ପୃକ୍ତ ସିଆରପି ଫେରାର ହୋଇଯାଇଥିବା ଅଭିଯୋଗ କରିଛନ୍ତି ମହିଳା ସଦସ୍ୟ ମାନେ ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
