ଅନୁଗୋଳ: ଅବକାରୀ ଚଢ଼ାଉ କରିବାକୁ ଯାଇ ମାଡ଼ ଖାଇଲେ ଅବକାରୀ କର୍ମଚାରୀ । କେବଳ ଏତିକି ନୁହେଁ ଲୋକଙ୍କ ମାଡ଼ରେ ଗାଡି ଭଙ୍ଗାରୁଜାରେ ୪ ଆହତ ମଧ୍ୟ ହୋଇଛନ୍ତି । ଘଟଣା ଘଟିଛି ଅନୁଗୋଳ ଜିଲ୍ଲା ଛେଣ୍ଡିପଦା ଥାନା ବଗେଡିଆ ଗାଁ ରେ । ମଦ ଚଢ଼ାଉ କରିବାକୁ ଯାଇଥିବାବେଳେ ଅବକାରୀ ବିଭାଗର କର୍ମଚାରୀଙ୍କ ଉପରେ ଆକ୍ରମଣ ହୋଇଛି ।
ବାଗଡ଼ିଆ ଗାଁରେ ଆଜି ଅବକାରୀ ବିଭାଗ ଚଢ଼ାଉ କରୁଥିବାବେଳେ ଆକ୍ରମଣର ଶିକାର ହୋଇଛନ୍ତି । ମଦ ମାଫିଆମାନଙ୍କ ଆକ୍ରମଣରେ ଅବକାରୀ ବିଭାଗର ଗାଡି ଭଙ୍ଗାରୁଜା ହୋଇଥିବାବେଳେ ୪ ଜଣ କର୍ମଚାରୀ ଆହତ ହୋଇଛନ୍ତି । ସୂଚନାନୁସାରେ ଅନୁଗୋଳ ଅବକାରୀ ବିଭାଗ ବାଗଡ଼ିଆ ମନ୍ଦିରସାହିରେ ବିପୁଳ ପରିମାଣର ମହୁଲ ମଦ ବିକ୍ରି ହେଉଥିବା ଖବର ପାଇ ଚଢ଼ାଉ କରିଥିଲା ।
ଇନ୍ସପେକ୍ଟର କରୁଣା ଶଙ୍କର ତିୱାରୀଙ୍କ ନେତୃତ୍ବରେ ଏହି ଟିମ ଚଢ଼ାଉବେଳେ ବହୁ ପରିମାଣର ମହୁଲି ମଦ, ପୋଚ ଆଦି ଜବତ କରି ୩ ଜଣଙ୍କୁ ଅଟକ ରଖି ଅଧିକ ତଦନ୍ତ କରୁଥିଲା । ଏହି ସମୟରେ ସେହି ମଦ ମାଫିଆଙ୍କ କିଛି ସହଯୋଗୀ ଆସି ଅଟକ ୩ ଜଣ ନିର୍ଦ୍ଦୋଷ ଏବଂ ତାଙ୍କୁ ଛାଡ଼ି ଦେବାକୁ ଦାବି କରିଥିଲେ ।
ତେବେ ଅବକାରୀ ବିଭାଗ ସେମାନଙ୍କ କଥାକୁ ନ ଶୁଣି ତଦନ୍ତ ଜାରି ରଖିଥିବାବେଳେ ହଠାତ 10 ରୁ 15 ଜଣ ପୁରୁଷ ଓ ମହିଳା ଅବକାରୀ ବିଭାଗ ଉପରେ ଅତର୍କିତ ଆକ୍ରମଣ କରିଥିଲେ । ଢେଲା ପଥର ସହ ଠେଙ୍ଗାରେ ଆକ୍ରମଣ କରିବା ଫଳରେ ଅବକାରୀ ବିଭାଗର ଗାଡି ଭାଙ୍ଗିଯିବା ସହ ଇନ୍ସପେକ୍ଟର କରୁଣା ଶଙ୍କର ତିୱାରୀ , ସବ-ଇନ୍ସପେକ୍ଟର ଅରବିନ୍ଦ ରାଉତରାୟ, ଭକ୍ତବତ୍ସଳ ବର୍ମା, ଡ୍ରାଇଭର କାହ୍ନୁଚରଣ ସ୍ବାଇଁ ଆହତ ହୋଇଛନ୍ତି ।
ଆକ୍ରମଣ ପରେ ଅବକାରୀ ବିଭାଗ କର୍ମଚାରୀ ଘଟଣାସ୍ଥଳରୁ ପଳାଇ ଆସିବା ସହ ଛେଣ୍ଡିପଦା ପୋଲିସରେ ଅଭିଯୋଗ କରିଛନ୍ତି । ପୋଲିସ ଗାଁରେ ପହଞ୍ଚି ତଦନ୍ତ ଆରମ୍ଭ କରିଛି । ସମସ୍ତ ଆହତଙ୍କୁ ପ୍ରଥମେ ଛେଣ୍ଡିପଦା ଡାକ୍ତରଖାନା ଓ ପରେ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
