ଅନୁଗୋଳ: ଛେଣ୍ଡିପଦା ବନାଞ୍ଚଳରେ ହାତୀ ଉପଦ୍ରବ ଦିନକୁ ଦିନ ବଢିଚାଲିଛି । ଘରୁ ପଦାକୁ ବାହାରିଲେ ଗୋଡାଉଛି ଭୟ । ହାତୀ ପାଇଁ ନାକେଦମ ହେଉଛନ୍ତି ଗାଁ ଲୋକେ । ସେପଟେ ବନ ବିଭାଗର ନାଚାର ପଣିଆ ଗ୍ରାମବାସୀଙ୍କୁ ରାତି ଅନିଦ୍ରା ହେବାକୁ ବାଧ୍ୟ କରୁଛି । ହାତୀ ଆତଙ୍କରେ ସବୁଠୁ ଅଧିକ କ୍ଷତିଗ୍ରସ୍ତ ହେଉଛନ୍ତି ଚାଷୀକୂଳ । ଏହାର ପ୍ରତିବାଦ କରି ଏସୟୁସିଆଇ (SUCI) କମ୍ୟୁନିଷ୍ଟ ଡାକରାରେ ଚାଷୀ କରିଛନ୍ତି ବିକ୍ଷୋଭ । ଚାଷୀଙ୍କ ପକ୍ଷରୁ 9 ଦଫା ଦାବି ନେଇ ବ୍ଲକ ସମ୍ମୁଖରେ ବିକ୍ଷୋଭ କରାଯାଇଛି ।
ହାତୀ ଉପଦ୍ରବରେ ଚାଷୀଙ୍କ ଫସଲ ଉଜୁଡ଼ି ଗଲାଣି । ଅନୁଗୋଳ ଜିଲ୍ଲାର ଛେଣ୍ଡିପଦା ବନାଞ୍ଚଳ ରାସ୍ତାରେ ଦିନରାତି ହାତୀ ଚଳାଚଳ କରୁଛନ୍ତି, ଯାହା ପଥଚାରୀଙ୍କୁ ସମସ୍ୟାରେ ପକାଉଛି । SUCI କମ୍ୟୁନିଟି ପାର୍ଟିର ସହଯୋଗରେ ଛେଣ୍ଡିପଦା ଡାକ ବଙ୍ଗଳାରୁ ଶତାଧିକ ଚାଷୀ ଏକ ରାଲିରେ ବାହାରି ବଜାର ପରିକ୍ରମା କରି ବ୍ଲକ୍ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଛନ୍ତି । ଚାଷୀଙ୍କ ଜମିରେ ଜଳସେଚନ ସୁବିଧା, ଶୀତଳ ଭଣ୍ଡାର ନିର୍ମାଣ, ଚାଷୀଙ୍କୁ ପେନସନ, ମରୁଡି ଘୋଷଣା, ହାତୀ ଉପଦ୍ରବ ରୋକିବା ଭଳି ୯ଟି ଦାବି ରଖି ରାଜ୍ୟ ସରକାରଙ୍କ ବିରୋଧରେ ଚାଷୀମାନେ ଗର୍ଜିଥିଲେ ।
ଏଭଲିକି ଏହାର ତୁରନ୍ତ ସମାଧାନ ନକଲେ ଆସନ୍ତା ୧୬ ତାରିଖରେ ବିଧାନସଭା ଘେରାଉ କରିବା ପାଇଁ କଡା ଚେତାବନୀ ଦେଇଛନ୍ତି । ଏହାସହ ଛେଣ୍ଡିପଦା ବିଡିଓଙ୍କୁ ଦାବି ପତ୍ର ପ୍ରଦାନ କରିଛନ୍ତି । ଆଗାମୀ ଦିନରେ ଏହାର ସ୍ଥାୟୀ ପ୍ରତିକାର ନକଲେ ବଡ ଧରଣର ଆନ୍ଦୋଳ କରିବେ ବୋଲି ଚାଷୀକୂଳ ଧମକ ଦେଇଛନ୍ତି ।
ଅନୁଗୋଳକୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
