ଅନୁଗୋଳ: ପୁରା ଫିଲ୍ମ ଷ୍ଟାଇଲ । ବାପା ଠାରୁ ଟଙ୍କା ହଡପ ପାଇଁ ପୁଅ ନିଜେ ନିଜକୁ କରିଥିଲା ଅପହରଣ । ଯାହା କୌଣସି ନାଟକ ଠାରୁ ବି କମ ନଥିଲା । ଆଉ ଏହି ନାଟକ ଫ୍ଲପ କରିଦେଲା ପୋଲିସ । ଟଙ୍କା ହଡପ ପାଇଁ ଅପହରଣ ନାଟକ କରି ପୋଲିସ ହାତରେ ଧରା ପଡିଛି ପୁଅ । ଏପରି ଘଟଣା ଘଟିଛି ଅନୁଗୋଳ ଥାନା ଅଞ୍ଚଳରେ ।
ପୋଲିସ ସୂଚନା ଅନୁସାରେ, ଗତକାଲି (ସୋମବାର) ଅନୁଗୋଳ ସହରର ସିମିଳିପଡା ପଞ୍ଚାନନ ଘୋଷ ନାମକ ବ୍ୟକ୍ତି ଅନୁଗୋଳ ଥାନାରେ ଏକ ଅଭିଯୋଗ କରିଥିଲେ । ତାଙ୍କ ପୁଅ ଗୌରବ ଘୋଷ ତାଳଚେର ପପୁ ନାମକ ଜଣେ ଯୁବକ ଠାରୁ 40ହଜାର ଟଙ୍କା ଆଣିଥିଲା । ଆଉ ଏହି ଟଙ୍କା ଦେବାକୁ ଫୋନ ଆସିଥିଲା । ତେବେ ଫୋନ ଆସିବା ପରେ ଗୌରବ ଘରୁ ଚାଳିଶ ହଜାର ଟଙ୍କା ନେଇ ବାହାରକୁ ଯାଇଥିଲେ । ଏହାପରେ ଆଉ ଫେରି ନ ଥିଲେ ।
ସେପଟେ ପଞ୍ଚାନନ ସନ୍ଧ୍ୟାରେ ଶକ୍ତି ନାମକ ବ୍ୟକ୍ତି ଠାରୁ ଆଉ ଏକ ଫୋନ କଲ ପାଇଥିଲେ ଯେଉଁଥିରେ ତାଙ୍କୁ ପଚିଶ ହଜାର ଟଙ୍କା ନଦେଲେ ତାଙ୍କ ପୁଅ ଆଉ ଫେରିବନି ବୋଲି ଚେତାବନୀ ଦିଆ ଯାଇଥିଲା । ଟଙ୍କା ଧରି ଆସି ପୁଅକୁ ନେଇ ଯିବାକୁ ସେମାନେ ଚେତାବନୀ ଦେଇଥିଲେ । ଫଳରେ ନିଜ ପୁଅ ଜୀବନ ପ୍ରତି ବିପଦ ଥିବା ଭାବି ଫୋନ କଲ ମୁତାବକ ପିଟିସି ହାଇସ୍କୁଲ ଛକରେ ରାତି ପ୍ରାୟ ଆଠଟା ବେଳେ ଟଙ୍କା ନେଇ ପହଞ୍ଚିଥିଲେ ପଞ୍ଚାନନ ।
ତେବେ ସେ ସେଠାରେ ପହଞ୍ଚିବା କ୍ଷଣି 4 ଜଣ ଯୁବକ ହଠାତ ସେଠାରେ ପହଞ୍ଚି ପଞ୍ଚାନନଙ୍କୁ ମାଡମାରି 25 ହଜାର ଟଙ୍କା ନେଇ ପଳାଇଗଲେ । ଏହି ଘଟଣା ପରେ ପଞ୍ଚାନନଙ୍କର ପୁଅ ଗୌରବ ଉପରେ ସନ୍ଦେହ ହୋଇଥିଲା । ଏସବୁ ତାଙ୍କ ପୁଅ ଦ୍ବାରା କରାଯାଇଥିବା ସେ ଜାଣିବାକୁ ପାଇବା ସହ ଏ ନେଇ ଅନୁଗୋଳ ଥାନାରେ ଲିଖିତ ଅଭିଯୋଗ କରିଥିଲେ । ପୋଲିସ ଘଟଣାର ତଦନ୍ତ କରି ଏହି ଅପହରଣ ନାଟକ ରଚିଥିବା ଗୌରବ ଏବଂ ତାର ଅନ୍ୟ ତିନି ସହଯୋଗୀଙ୍କୁ ଗିରଫ କରିଥିଲା । ଗିରଫ ଅଭିଯୁକ୍ତ ମାନେ ହେଲେ ଅନୁଗୋଳ ଅମଲାପଡାର ବିନୋଦ ବେହେରା, ଲିଙ୍ଗରାଯୋଡି ଗାଁର ଶକ୍ତି ପ୍ରସାଦ ମହାନ୍ତି, ସମଲ ଥାନା ଗହମ ଗ୍ରାମର ପପୁନ କୁମାର ସାହୁ ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
