ଅନୁଗୋଳ: ବାଟବଣା ହେଉଛି କେନ୍ଦ୍ର ସରକାରଙ୍କ ପ୍ରଧାନମନ୍ତ୍ରୀ ଆବାସ ଯୋଜନା। ଗରିବ ହିତାଧିକାରୀ ଏହି ଯୋଜନାର ସୁଫଳ ପାଇପାରୁନାହାଁନ୍ତି। ଯାହାଫଳରେ ହତାଶ ହୋଇ ଧାର କରଜରେ ବୁଡୁଛନ୍ତି ଅନେକ ଲୋକେ। ତେବେ ଏଭଳି ଏକ ଅଭିଯୋଗ ଆସିଛି ଅନୁଗୋଳ ଜିଲ୍ଲାର ପୁରୁଣାକୋଟ ପଞ୍ଚାୟତରୁ।
ଏହି ଜିଲ୍ଲାର ସାତକୋଶିଆ ବ୍ୟାଘ୍ର ପ୍ରକଳ୍ପ ଭିତରେ ଥିବା ଟୁଲୁକା ଓ କଟରଙ୍ଗ ଗାଁରେ ସରକାରୀ ଯୋଜନା କାର୍ଯ୍ୟକାରୀ ହେଉ ନଥିବା ଅଭିଯୋଗ ହୋଇଛି। ଗତ 6 ମାସ ପୂର୍ବେ 20ରୁ ଅଧିକ ଗରିବ ହିତାଧିକାରୀଙ୍କୁ ପ୍ରଧାନମନ୍ତ୍ରୀ ଆବାସ ଯୋଜନାରେ ଅନ୍ତର୍ଭୁକ୍ତ କରାଯାଇଥିଲା। ଫଳରେ ହିତାଧିକାରୀମାନେ ଧାର କରଜ କରି ଘର ତିଆରି କରୁଛନ୍ତି। କିନ୍ତୁ କିଛି ପ୍ରଶାସନିକ କର୍ମଚାରୀ ସେମାନଙ୍କୁ ଆଉ ଘର ତିଆରି ନକରିବାକୁ ନିର୍ଦ୍ଦେଶ ଦେଇଛନ୍ତି।ଏପରିକି ଘର କଲେ ମଧ୍ୟ ଆଉ ଟଙ୍କା ମିଳିବ ନାହିଁ ବୋଲି ସଫାସଫା ଶୁଣାଇଦେଇଛନ୍ତି। ଏହାକୁ ନେଇ ଏବେ ଲୋକଙ୍କ ମଧ୍ୟରେ ଛନକା ପସି ଯାଇଛି। ଯାହାର ପ୍ରତିବାଦରେ ଆଜି ପୁରୁଣାକୋଟ ସରପଞ୍ଚ ଅନନ୍ତ ବାସୁଦେବ ମହାନ୍ତିଙ୍କ ନେତୃତ୍ବରେ ଉଭୟ କଟରଙ୍ଗ ଓ ଟୁଲୁକା ଗାଁର ବହୁ ହିତାଧିକାରୀ ଆସି ଜିଲ୍ଲାପାଳଙ୍କୁ ଲିଖିତ ଭାବେ ଅଭିଯୋଗ କରିଛନ୍ତି।
ସୂଚନା ଥାଉ କି, ସାତକୋଶିଆ ବ୍ୟାଘ୍ର ସଂରକ୍ଷଣ ପ୍ରକଳ୍ପ ପାଇଁ ଏହି ଦୁଇଟି ଗାଁ ଉଛେଦ ହେବା ନେଇ କଳ୍ପନା ଜଳ୍ପନା ଚାଲିଛି। ସେଥିପାଇଁ ସରକାରୀ ଯୋଜନା ବନ୍ଦ କରି ଦିଆଯାଉଛି ବୋଲି ଲୋକେ ଅଭିଯୋଗ କରିଛନ୍ତି। ତେବେ ସାତକୋଶିଆ ଅଧିକାରୀ କିମ୍ବା ପ୍ରଶାସନିକ ଅଧିକାରୀ ଏ ବାବଦରେ ମୁହଁ ଖୋଲୁ ନାହାନ୍ତି।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ,ଇଟିଭି ଭାରତ
