ଅନୁଗୋଳ: ବଢିବାରେ ଲାଗିଛି ହାତୀଙ୍କ ଉପଦ୍ରବ । ହାତୀମାନଙ୍କ ଉପଦ୍ରବରେ ଅତିଷ୍ଠ ହେଲେଣି ଗ୍ରାମବାସୀ । କେତେବେଳେ ଧାନବିଲରେ ପଶି ଧାନ ନଷ୍ଟ କରୁ୍ଛି ତ କେତେବେଳେ ଘର ଦ୍ବାର ଭାଙ୍ଗି ଲୋକଙ୍କ ଜୀବନ ନେଉଛି ହାତୀ । ହାତୀଙ୍କ ଉପଦ୍ରବ ସହି ନପାରି ଭୟରେ ଗାଁ ଛାଡ଼ୁଛନ୍ତି ଲୋକେ । ଏଭଳି ସ୍ଥିତି ଉପୁଜୁଛି ଅନୁଗୋଳରେ । ଜିଲ୍ଲାର ହଣ୍ଡପା ବନାଞ୍ଚଳର ମଣ୍ଡାଆମ୍ବ ଗାଁର ୧୦ ପରିବାର ହାତୀଙ୍କ ଉପଦ୍ରବ ସହି ନପାରି ଗାଁ ଛାଡ଼ିଛନ୍ତି । ହାତୀ ତାଙ୍କ ଘରଭାଙ୍ଗି ତାଙ୍କୁ ବାସହରା କରିଦେଇଥିବା ଅଭିଯୋଗ କରିଛନ୍ତି ଗ୍ରାମବାସୀ । ଏହାସହ ବନ ବିଭାଗକୁ ଜଣାଇବା ପରେ ମଧ୍ୟ ସେ ବିଳମ୍ବରେ ପଦକ୍ଷେପ ନେଉଥିବା ଗ୍ରାମବାସୀ ଅଭିଯୋଗ ଆଣିଛନ୍ତି ।
ଅନୁଗୋଳରେ ହାତୀଙ୍କ ଉତ୍ପାତ ଚରମ ସୀମାରେ ପହଞ୍ଚିଲାଣି । ହାତୀ ଭୟରେ ଆତଙ୍କିତ ଜିଲ୍ଲାର ଅନେକ ଗାଁର ଲୋକେ । ବନ୍ତଳା ବନାଞ୍ଚଳରେ ହାତୀ ଲୋକଙ୍କ ଜୀବନ ନେଉଥିବା ବେଳେ ଫସଲ ନଷ୍ଟ କରୁଛନ୍ତି । ଏହି ବନାଞ୍ଚଳରୁ ହାତୀ ଘଉଡାଇବା ପାଇଁ ବିଭାଗ ଯୋଜନା କରିଥିବା ବେଳେ ଜିଲ୍ଲାର ଆଠମଲ୍ଲିକ ବନଖଣ୍ଡରେ ଦେଖା ଦେଇଛି ହାତୀଙ୍କ ପାଦୁର୍ଭାବ । ବନଖଣ୍ଡର ହଣ୍ଡାପା ବନାଞ୍ଚଳରେ ହାତୀ ଉପଦ୍ରବ ବଢ଼ି ଚାଲିଥିବାରୁ ଭୟରେ ଲୋକେ ଗାଁ ଛାଡିଥିବା ନଜରକୁ ଆସିଛି ।
ଗ୍ରାମବାସୀ ଅଭିଯୋଗ କରିଛନ୍ତି ଯେ, ନାକଚି ପଞ୍ଚାୟତ ମଣ୍ଡା ଆମ୍ବ ଗାଁରେ ଏକ ଦନ୍ତା ହାତୀ ଗତ କିଛି ଦିନ ହେବ ଆତଙ୍କ ସୃଷ୍ଟି କରିଥିବାରୁ ଲୋକେ ଗାଁ ଛାଡି ଚାଲି ଯାଇଛନ୍ତି । ହାତୀ ଘର ଦ୍ବାର ଭାଙ୍ଗିବା ସହ ଆକ୍ରମଣ କରୁଥୁବାରୁ ଗାଁ ଛାଡ଼ିବାକୁ ବାଧ୍ୟ ହୋଇଛନ୍ତି ଲୋକେ । ଯେତେଥର ଘର କରିଛନ୍ତି ହାତୀ ତାହାକୁ ଭାଙ୍ଗି ଦେଉଛି । ବନ ବିଭାଗକୁ ଯେତେ ଥର ଅଭିଯୋଗ କଲେ ମଧ୍ୟ ହାତୀ ଘଉଡାଇବା ଦିଗରେ କୌଣସି ପଦକ୍ଷେପ ନେଉ ନାହିଁ । ଗାଁରେ ରହିବା ସମ୍ଭବପର ହୋଇ ପାରୁନି । ହାତୀ ଆକ୍ରମଣରେ ଜୀବନ ଯିବା ଭୟରେ ରହୁଛନ୍ତି ଗ୍ରାମବାସୀ । ତେଣୁ ସେମାନେ ଗାଁରେ ଆଉ ରହିବେ ନାହଁ । ସେଥିପାଇଁ ସେମାନେ ନିଜର ଆସବାବପତ୍ର ଧରି ଗାଁ ଛାଡି ଅନ୍ୟତ୍ର ପଳାଉଛନ୍ତି । ସରକାର ତାଙ୍କ ଦୁଃଖ ଶୁଣନ୍ତୁ ତାଙ୍କୁ ଅନ୍ୟତ୍ର ଘର କରେଇ ଦିନ୍ତୁ ବୋଲି ଦାବି କରିଛନ୍ତି ଗ୍ରାମବାସୀ ।
ଏନେଇ ବନ ବିଭାଗର କହିବା କଥା ହାତୀ ଘଉଡାଇବା ପାଇଁ ସବୁ ପ୍ରଚେଷ୍ଟା କରାଯାଇଛି । ଆମ୍ବ ଓ ପଣସର ପାଚିବା ସମୟ ହୋଇ ଥିବାରୁ ହାତୀମାନେ ଗାଁ ପାଖାପାଖି ରହୁଛନ୍ତି । ତଥାପି ହାତୀ ଯେଭଳି କ୍ଷୟକ୍ଷତି ନ କରେ ସେଥିପାଇଁ ପ୍ରଚେଷ୍ଟା ଜାରି ରହିଛି ।
ଇଟିଭି ଭାରତ, ଅନୁଗୋଳ
