ଅନୁଗୋଳ: ଜିଲ୍ଲାର ବାମୁରୁ ଠାରୁ ବଅଁରପାଳ ପର୍ଯ୍ୟନ୍ତ ୫୫ ନମ୍ବର ଜାତୀୟ ରାଜପଥର ଅବସ୍ଥା ଶୋଚନୀୟ ହୋଇପଡିଛି । ଏହାକୁ ପ୍ରତିବାଦ ଜଣାଇ ଆଜି(ରବିବାର) ଓକିଲ ସଂଘ ପକ୍ଷରୁ 6 ଘଣ୍ଟିଆ ରାଜପଥ ଅବରୋଧ ଡାକରା ଦିଆଯାଇଛି । ଏନେଇ ଶନିବାର ଅପରାହ୍ନରେ ଓକିଲ ସଂଘ ପକ୍ଷରୁ ଏକ ସାମ୍ବାଦିକ ସମ୍ମିଳନୀରେ ସୂଚନା ଦିଆଯାଇଛି ।
ବାମୁରୁ ଠାରୁ ବଅଁରପାଲ ପର୍ଯ୍ୟନ୍ତ ଜାତୀୟ ରାଜପଥ ମରଣଯନ୍ତା ପାଲଟିଛି । ରାସ୍ତା ସାର ଖାଲଖମାରେ ପରିପୂର୍ଣ୍ଣ ହୋଇଛି । ଗାଡି ତ ଦୂରର କଥା ପାଦରେ ଚାଲି ଯିବା ମଧ୍ୟ କଷ୍ଟକର ହୋଇପଡିଛି । ରାସ୍ତାର ଦୂରବସ୍ଥା ପାଇଁ ଶହ ଶହ ଲୋକ ଦୁର୍ଘଟଣାର ଶିକାର ହୋଇ ପ୍ରାଣ ହରାଉଛନ୍ତି। ବାରମ୍ବାର ପ୍ରଶାସନକୁ ଗୁହାରି କଲେ ମଧ୍ୟ ରାସ୍ତା ମରାମତି ହେଉନାହିଁ ।
ତେଣୁ ଓକିଲ ସଂଘ ତୁରନ୍ତ ରାସ୍ତା ମରାମତି ଦାବିରେ ଆଜି(ରବିବାର) ସକାଳ ୬ଟା ଠାରୁ ମଧ୍ୟାହ୍ନ ୧୨ଟା ପର୍ଯ୍ୟନ୍ତ ବାମୁରୁ, ବଇଣ୍ଡା, ବଡକେରା, ହୁଳୁରୁସିଂହା, ଅନୁଗୋଳ, ନାଲକୋ ଓ ବଅଁରପାଳ ଠାରେ ଏକ କାଳୀନ ରାସ୍ତା ଅବରୋଧ କରାଯିବ ବୋଲି ପ୍ରେସମିଟ ଜରିଆରେ ସୂଚନା ଦେଇଛନ୍ତି। ଏହି କାର୍ଯ୍ୟକ୍ରମରେ ଜିଲ୍ଲାର ଟ୍ରକ ମାଲିକ ସଂଘ, ବସ ମାଲିକ ସଂଘ, ସମସ୍ତ ରାଜନୈତିକ ଦଳ ସମେତ ଜନସାଧାରଣ ସହଯୋଗ କରୁଛନ୍ତି।
ଇଟିଭି ଭାରତ,ଅନୁଗୋଳ
