ହାଇଦ୍ରାବାଦ: ଚଳିତ ଟୋକିଓ ଅଲମ୍ପିକ୍ରେ ବ୍ରୋଞ୍ଜ ପଦକ ବିଜୟିନୀ ବ୍ୟାଡମିଣ୍ଟନ ଖେଳାଳି ପିଭି ସିନ୍ଧୁଙ୍କୁ ଆନ୍ଧ୍ର ସରକାର ଦେବେ ୩୦ ଲକ୍ଷ ଟଙ୍କା ପୁରସ୍କାର ରାଶି । ଏନେଇ ଆନ୍ଧ୍ର ପ୍ରଦେଶ ସରକାର ଘୋଷଣା କରିଛନ୍ତି ।
ମୁଖ୍ୟମନ୍ତ୍ରୀ ୱାଇ. ଏସ. ଜଗନ ମୋହନ ରେଡ୍ଡି ରାଜ୍ୟ କ୍ରୀଡାନୀତି ଅନୁଯାୟୀ, ସିନ୍ଧୁଙ୍କୁ ଆର୍ଥିକ ପୁରସ୍କାର ମଙ୍ଗଳବାର ସୁଦ୍ଧା ପ୍ରଦାନ କରିବାକୁ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି । ନିୟମ ଅନୁଯାୟୀ, ସ୍ବର୍ଣ୍ଣ ପଜତ ବିଜେତାଙ୍କୁ ୭୫ ଲକ୍ଷ, ରୌପ୍ୟ ପଦକ ବିଜେତାଙ୍କୁ ୫୦ ଲକ୍ଷ ଓ ବ୍ରୋଞ୍ଜ ବିଜେତାଙ୍କୁ ୩୦ ଲକ୍ଷ ଆର୍ଥିକ ପୁରସ୍କାର ମିଳିବ ।
ପୂର୍ବରୁ ମୁଖ୍ୟମନ୍ତ୍ରୀ ଜଗନ ମୋହନ ଅଲମ୍ପିକ ଅଂଶଗ୍ରହଣ କରିବାକୁ ଯାଉଥିବା ରାଜ୍ୟର ତିନି ଖେଳାଳି ପିଭି ସିନ୍ଧୁ, ସାତ୍ବିକ ସାଇରାଜ ଓ ମହିଳା ହକି ଖେଳାଳି ରଜନୀ ଇତିମାର୍ପୁଙ୍କୁ ୫ ଲକ୍ଷ ଲେଖାଏଁ ଅର୍ଥରାଶି ପ୍ରଦାନ କରିଥିଲେ । ବିଶାଖାପାଟ୍ଟନାମରେ ଏକ ବ୍ୟାଡମିଣ୍ଟନ ଏକାଡେମୀ ତିଆରି କରିବାକୁ ସିନ୍ଧୁଙ୍କୁ ଦୁଇ ଏକର ଜମି ମଧ୍ୟ ପ୍ରଦାନ କରିଥିଲେ ମୁଖ୍ୟମନ୍ତ୍ରୀ ।
ଆନ୍ଧ୍ର ପ୍ରଦେଶ ସରକାରରେ ସିନ୍ଧୁ ଜଣେ କର୍ମଚାରୀ ରହିଛନ୍ତି । ୨୦୧୬ରେ ରିଓ ଅଲମ୍ପିକରେ ରୌପ୍ୟ ପଜତ ଜିତିବା ପରେ ପୂର୍ବତନ ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁ ଡେପୁଟି କଲେକ୍ଟର ଚାକିରୀ ପ୍ରଦାନ କରିଥିଲେ । ତେଲେଙ୍ଗାନା ସରକାର ୫ କୋଟି ଓ ଆନ୍ଧ୍ର ପ୍ରଦେଶ ସରକାର ୩ କୋଟି ଟଙ୍କା ସହ ବଡ ସରକାରୀ ଚାକିରୀ ପ୍ରଦାନ କରିଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
