ଟୋକିଓ: ଅଲମ୍ପିକ ଉଦ୍ଯାପନୀ ସମାରୋହରେ ଯୋଗଦେଉଥିବା ଭାରତୀୟ ଆଥଲେଟଙ୍କ ସଂଖ୍ୟା ଉପରେ କୌଣସି ସୀମା ରଖାଯାଇନାହିଁ, କିନ୍ତୁ ଅଧିକାରୀଙ୍କ ସଂଖ୍ୟା 10ରେ ରଖାଯାଇଛି । ଆଥଲେଟ୍ମାନଙ୍କୁ ଉଦ୍ଘାଟନୀ ସମାରୋହରେ ପିନ୍ଧିଥିବା ପାରମ୍ପରିକ ପୋଷାକ ପରିବର୍ତ୍ତେ ଆରାମଦାୟକ ଟ୍ରାକ୍ ସୁଟ୍ରେ ଦେଖିବାକୁ ମିଳିବ ।
ଅଧିକାଂଶ ହକି ଓ କୁସ୍ତି ଟିମର ଖେଳାଳି ଏହି ସମାରୋହରେ ସାମିଲ ହେବା ଆଶା କରାଯାଉଛି । ଭାରତୀୟ ସମୟ ଅନୁସାରେ ଅପରାହ୍ନ ୪.୩୦ରେ ଏହି କାର୍ଯ୍ୟକ୍ରମ ଆରମ୍ଭ ହେବାର ସୂଚୀ ରହିଛି । ପୂର୍ବ ଘୋଷଣା ଅନୁଯାୟୀ, ଶନିବାର ବ୍ରୋଞ୍ଜ ପଦକ ଜିତିଥିବା କୁସ୍ତିଯୋଦ୍ଧା ବଜରଙ୍ଗ ପୁନିଆ ଭାରତର ଧ୍ବଜାବାହକ ରହିବେ ।
ଭାରତୀୟ ଅଲମ୍ପିକ ଆସୋସିଏସନର ନିୟମ ମୁତାବକ ସ୍ବର୍ଣ୍ଣ ବିଜେତା ନୀରଜ ଚୋପ୍ରାଙ୍କ ସହିତ ଅନ୍ୟ ପଦକ ବିଜେତା ଆସନ୍ତାବର୍ଷ ହେବାକୁ ଥିବା ଏସିଆ ଗେମ୍ସ ଓ କମନୱେଲ୍ଥ ଗେମ୍ସରେ ଭାରତର ଧ୍ବଜା ବାହକ ରହିବାକୁ ମନୋନୀତ ହେବେ । ଉଦ୍ଘାଟନୀ ସମାରୋହରେ ପୁରୁଷ ହକି ଟିମର କ୍ୟାପଟେନ ମନପ୍ରୀତ ସିଂହ ଓ ଚମ୍ପିଆନ ବକ୍ସର ମେରୀକମ ଭାରତର ଧ୍ବଜାବାହକ ରହିଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
