ନୂଆଦିଲ୍ଲୀ: ନିକଟରେ କେନ୍ଦ୍ର ସରକାରଙ୍କ ପକ୍ଷରୁ ଘୋଷଣା ହୋଇଛି ସମ୍ମାନଜନକ ପଦ୍ମ ପୁରସ୍କାର । ତେବେ ଦେଶର ଏହି ସମ୍ମାନ ଜନକ ପୁରସ୍କାର ଚୟନକୁ ନେଇ ପ୍ରଶ୍ନ ଉଠାଇଛନ୍ତି ଷ୍ଟାର ମହିଳା କୁସ୍ତିଯୋଦ୍ଧା ବିନେଶ ଫୋଗାଟ ।
ବିନେଶ ଫୋଗାଟ କହିଛନ୍ତି କେଉଁମାନେ ଏହି ସମ୍ମାନଜନକ ପୁରସ୍କାର ଚୟନ କରୁଛନ୍ତି ? କେଉଁମାନେ ସମ୍ମାନିତ ହେବେ କିଏ ନିଷ୍ପତ୍ତି ନେଉଛନ୍ତି ? ଚୟନ କମିଟିରେ ପୂର୍ବତନ ଆଥଲେଟ ରହିଛନ୍ତି କି ? ଘୋଷଣା ହୋଇଥିବା ତାଲିକାକୁ ନେଇ ଅସନ୍ତୋଷ ଜାହିର କରିଛନ୍ତି ବିନେଶ । ଅନ୍ୟପଟେ ଘୋଷିତ ତାଲିକାରେ ବିନେଶଙ୍କ ନାମ ନଥିବାରୁ ସେ କ୍ଷୋଭ ପ୍ରକାଶ କରିଥିବା କୁହାଯାଉଛି ।
ତେବେ 25 ବର୍ଷୀୟ ବିନେଶ ଫୋଗାଟ ଜାକର୍ତ୍ତା 2018 ଏସିଆନ ଗେମ୍ସରେ ସ୍ବର୍ଣ୍ଣ ପଦକ ଜିତି ଇତିହାସ ରଚିଥିଲେ । ପ୍ରଥମ ମହିଳା ଭାରତୀୟ କୁସ୍ତି ଯୋଦ୍ଧା ଭାବେ ସ୍ବର୍ଣ୍ଣିମ ସଫଳତା ହାସଲ କରିଥିଲେ ବିନେଶ । ଏଥିସହିତ ତାଙ୍କର ପ୍ରଦର୍ଶନ ଗତ କିଛି ବର୍ଷଧରି ବେଶ ଦମଦାର ରହିଛି । ବିଭିନ୍ନ ସମ୍ମାନଜନକ ଟୁର୍ଣ୍ଣାମେଣ୍ଟରେ କୁସ୍ତିରେ ଭାରତକୁ ପଦକ ଭେଟି ଦେଇଛନ୍ତି ଏହି ଷ୍ଟାର ମହିଳା କୁସ୍ତି ଯୋଦ୍ଧା ।
କଳା, ସାହିତ୍ୟ, କ୍ରୀଡା, ମନୋରଞ୍ଜନ, ସମାଜସେବା ସମେତ ସମାଜର ବିଭିନ୍ନ ବର୍ଗରେ ଉଲ୍ଲେଖନୀୟ ପ୍ରଦର୍ଶନ ସହ ଜୀବନ ବ୍ୟାପି ସାଧନାକୁ ଏହି ପୁରସ୍କାର ପରିଚୟ ପ୍ରଦାନ କରିଥାଏ । ଚଳିତ ବର୍ଷ ଏନେଇ ଭାରତ ସରକାରଙ୍କ ପକ୍ଷରୁ ଦେଶର ଅନନ୍ୟ ବ୍ୟକ୍ତିବିଶେଷ ଓ 141 ଜଣ ବିଶେଷ ପ୍ରତିଭାଙ୍କୁ ପଦ୍ମ ପୁରସ୍କାର ପ୍ରଦାନ ପାଇଁ ଘୋଷଣା ହୋଇଛି । ଏହି ତାଲିକାରେ 7ଜଣଙ୍କୁ ପଦ୍ମବିଭୁଷଣ, 16 ଜଣଙ୍କୁ ପଦ୍ମ ଭୁଷଣ ଓ 118 ଜଣଙ୍କୁ ପଦ୍ମଶ୍ରୀ ପୁରସ୍କାର ପାଇଁ ଘୋଷଣା ହୋଇଛି ।
