ଟୋକିଓ: ବିଶ୍ବ କ୍ରୀଡାର ମହାକୁମ୍ଭ ଅଲମ୍ପିକ୍ସ ପାଇଁ ଆରମ୍ଭ ହୋଇସାରିଛି କାଉଣ୍ଟଡାଉନ୍ । ଆସନ୍ତାକାଲି (ଶୁକ୍ରବାର) ଟୋକିଓ ଅଲମ୍ପିକ୍ସର ଉଦ୍ଘାଟନୀ ଉତ୍ସବ ଆରମ୍ଭ ହେବ । ତେବେ ମହାମାରୀ COVID-19ର ଭୟ ଯୋଗୁଁ ଆୟୋଜକ ଉଦ୍ଘାଟନୀ ଉତ୍ସବରେ ଯୋଗଦେବାକୁ ଥିବା ସମସ୍ତ ଦେଶର ଆଥଲେଟଙ୍କ ସଂଖ୍ୟାକୁ ସୀମିତ କରିଛନ୍ତି ।
ଫଳରେ ଭାରତୀୟ ଅଲମ୍ପିକ ଟିମରୁ ମାତ୍ର ୨୮ ଜଣ ସଦସ୍ୟ ଉଦ୍ଘାଟନୀ ସମାରୋହରେ ତ୍ରିରଙ୍ଗା ଯାତ୍ରାରେ ସାମିଲ ହେବେ । ଏଥିରେ ୨୨ଜଣ ଖେଳାଳି ଓ ୬ଜଣ ଅଧିକାରୀ ରହିଛନ୍ତି ।
ଭାରତୀୟ ଟିମରେ ସାମିଲ ହେବାକୁ ଥିବା ତାଲିକା ଅନୁଯାୟୀ, ହକିକୁ ମାତ୍ର ଜଣେ ଖେଳାଳି ରହିବେ । ପୁରୁଷ ହକି ଦଳର କ୍ୟାପଟେନ ମନପ୍ରୀତ ସିଂହ ବକ୍ସର ମେରୀ କମ୍ଙ୍କ ସହିତ ଭାରତର ଧ୍ବଜା ବାହକ ରହିଛନ୍ତି ।
ଉଦ୍ଘାଟନୀ ସମାରୋହରେ ବକ୍ସିଂ ଟିମରୁ ସର୍ବାଧିକ ୮ଜଣ ସଦସ୍ୟ ଓ ଟେବୁଲ ଟେନିସରୁ ୪ ଜଣ ଓ ରୋଇଂରୁ ଦୁଇଜଣ ସଦସ୍ୟ ରହିଛନ୍ତି । ସେହିପରି ଜିମ୍ନାଷ୍ଟିକ୍ସ, ସୁଇମିଂ ଓ ଫେନ୍ସିଂରୁ ଜଣେ ଲେଖାଏଁ ସଦସ୍ୟ ରହିଛନ୍ତି ।
ସମାନ ଦିନ ଓ ପରଦିନ ସେମାନଙ୍କର ଇଭେଣ୍ଟ ରହିଥିବାରୁ, ତୀରନ୍ଦାଜ ଖେଳାଳି, ଜୁଡୋ, ବ୍ୟାଡ୍ମିଣ୍ଟନ, ଭାରୋତ୍ତଳନ, ଟେନିସ, ସୁଟିଂ ଓ ହକି ଖେଳାଳି ଉଦ୍ଘାଟନୀ ସମାରୋହରେ ଅଂଶଗ୍ରହଣ କରିବେ ନାହିଁ ।
ଜାପାନିଜ ବର୍ଣ୍ଣମାଳା କ୍ରମ ଅନୁଯାୟୀ ଅଲମ୍ପିକ ଅଂଶଗ୍ରହଣକାରୀ ଦେଶ ମାର୍ଚ୍ଚ (march-past)କରିବେ । ଭାରତର ନମ୍ବର march-past ତାଲିକାର ୨୧ତମ ସ୍ଥାନରେ ଥିବା ଅଲମ୍ପିକ ଆୟୋଜକ କମିଟି ସ୍ପଷ୍ଟ କରିଛି ।
ଶୁକ୍ରବାର ଅଲମ୍ପିକ ଷ୍ଟାଡିୟମରେ ଟୋକିଓ ଅଲମ୍ପିକ୍ସର ଉଦ୍ଘାଟନୀ ସମାରୋହ ଅନୁଷ୍ଠିତ ହେବ ।
ଅନ୍ୟପଟେ ଅଗଷ୍ଟ ୮ରେ ଉଦ୍ଯାପନୀ ସମାରୋହ ଅନୁଷ୍ଠିତ ହେବାକୁ ଥିବା ଷ୍ଟାଡିୟମରେ ପ୍ରମୁଖ ଟ୍ରାକ୍ ଓ ଫିଲ୍ଡ ଇଭେଣ୍ଟ ସହିତ ମହିଳା ଫୁଟବଲ ସ୍ବର୍ଣ୍ଣ ପଦକ ମ୍ୟାଚ ମଧ୍ୟ ଖେଳାଯିବା ନେଇ ସୂଚୀ ରହିଛି ।
ଅନ୍ୟ ଦେଶ ଗୁଡିକ ମଧ୍ୟ ଉଦ୍ଘାଟନୀ ସମାରୋହକୁ ସୀମିତ ସଂଖ୍ୟକ ଆଥଲେଟ୍ ପଠାଇବାକୁ ସ୍ଥିର କରିଛନ୍ତି । ଅଷ୍ଟ୍ରେଲିଆ ୫୦ଜଣିଆ ଟିମ ପଠାଇବାକୁ ସ୍ପଷ୍ଟ କରିଥିବାବେଳେ, ବ୍ରିଟେନର ୩୦ ସଦସ୍ୟ ଅଂଶଗ୍ରହଣ କରିବେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
