ନୂଆଦିଲ୍ଲୀ: ଭାରତୀୟ ଅଲମ୍ପିକ ଆସୋସିଏସନ ସଭାପତି ନରିନ୍ଦର ବାତ୍ରାଙ୍କ ନାମରେ ସାଙ୍ଘାତିକ ଅଭିଯୋଗ । ଏଥର ଆଇଓଏ ଉପ-ସଭାପତି ସୁଧାଂଶୁ ମିତ୍ତଲ ନୁହଁନ୍ତି ବରଂ, ଭାରତୀୟ କରାଟେ ଆସୋସିଏସନ(KAI)ର ସାଧାରଣ ସମ୍ପାଦକ ଆମ୍ବେଦକର ଗୁପ୍ତା ଅଭିଯୋଗ ଆଣିଛନ୍ତି ।
ଅଭିଯୋଗ ଅନୁଯାୟୀ କରାଟେକୁ ଭାରତରେ ବନ୍ଦ କରିବାକୁ ଆଇଓଏ ସଭାପତି ଧମକ ଦେଇଥିବା ଗୁପ୍ତା କହିଛନ୍ତି । କରାଟେ ଆସୋସିଏସନ ସଭାପତି ଲିଖା ତାରାଙ୍କ ସହ ନରିନ୍ଦର ବାତ୍ରାଙ୍କର ମତପାର୍ଥକ୍ୟ ରହିଛି । ସେଥିପାଇଁ କରାଟେ ଆସୋସିଏସନଙ୍କୁ ଏକ ଚିଠି ଲେଖି ବନ୍ଦ କରିବାକୁ ବାତ୍ରା ଧମକ ଦେଇଥିବା ଅଭିଯୋଗ ହୋଇଛି ।
ଭାରତୀୟ ଅଲମ୍ପିକ ଆସୋସିଏସନର ଦୁଇ ଶୀର୍ଷ ମୁଖିଆଙ୍କ ମଧ୍ୟରେ ବିବାଦ କାହାରିକୁ ଅଜଣା ନାହିଁ । ଆଇଓଏ ଉପ ସଭାପତି ସୁଧାଂଶୁ ମିତ୍ତଲ, ସଭାପତିଙ୍କ ନାମରେ ନିର୍ବାଚନରେ ମିଥ୍ୟା ସତ୍ୟପାଠ ଓ ଅଯୋଗ୍ୟତା ଅଭିଯୋଗ ଆଣି ଅନ୍ତର୍ଜାତୀୟ ହକି ଫେଡେରେସନକୁ ଚିଠି ଲେଖିଥିଲେ । ଏପରି ସ୍ଥିତିରେ ଉଭୟ ଦେଶର ବିଭିନ୍ନ ଫେଡେରେସନର ସମର୍ଥନ ପାଇଁ ପ୍ରୟାସ କରିଛନ୍ତି । ଏମିତିକି ଫେଡେରେସନ ଗୁଡିକୁ ବିଭକ୍ତ କରିବାର କାର୍ଯ୍ୟ ମଧ୍ୟ କରିଛନ୍ତି । ଏନେଇ ମତ ରଖିବା ପରେ, ଭାରତୀୟ ଅଲମ୍ପିକ ଆସୋସିଏସନ ସଭାପତି ନରିନ୍ଦର ବାତ୍ରା ଆକ୍ରୋଶମୂଳକ ଭାବେ ଧମକ ଦେଇଥିବା କହିଛନ୍ତି ଆମ୍ବେଦକର ଗୁପ୍ତା ।
