ହାଇଦ୍ରାବାଦ: ଟୋକିଓ ଅଲମ୍ପିକ ଗେମ୍ସକୁ ଆଉ ମାତ୍ର 4 ମାସ ବାକି । ମାତ୍ର ବର୍ତ୍ତମାନ ସୁଦ୍ଧା ଅଲମ୍ପିକରେ ଅଂଶଗ୍ରହଣ କରିବାକୁ ଯାଉଥିବା ଖେଳାଳିଙ୍କୁ ମିଳିପାରିନି କୋରୋନା ଟିକା । ଏହାକୁ ନେଇ ଅସନ୍ତୁଷ୍ଟ ଭାରତୀୟ ଅଲମ୍ପିକ ଆସୋସିଏସନ ସଙ୍ଗୀନ ଅଭିଯୋଗ ଆଣିଛି । କୋଭିଡ-19 ଭାକସିନ୍ ନେଇ କ୍ରୀଡା ଓ ସ୍ବାସ୍ଥ୍ୟ ମନ୍ତ୍ରଣାଳୟ ମଧ୍ୟରେ ସମନ୍ବୟର ଅଭାବ ଥିବା କହିଛି ଆସୋସିଏସନ ।
ଅଲମ୍ପିକରେ ଦେଶକୁ ପ୍ରତିନିଧିତ୍ବ କରିବାକୁ ଯାଉଥିବା ଖେଳାଳିଙ୍କୁ ଟିକାକରଣରେ ସାମିଲ ନେଇ ଏଯାବତ କୌଣସି ଅପଡେଟ୍ ମିଳିନଥିବା କହିଛନ୍ତି ଆଇଓଏ ସାଧାରଣ-ସମ୍ପାଦକ ରାଜୀବ ମେହେଟ୍ଟା ।
ଅଲମ୍ପିକ ଆଶାବାଦୀ 27 ବର୍ଷୀୟ ଭାରତୀୟ ପୁରୁଷ 65 କିଲୋଗ୍ରାମ ବର୍ଗର ଫ୍ରିଷ୍ଟାଇଲ କୁସ୍ତିଯୋଦ୍ଧା ବଜରଙ୍ଗ ପୁନିଆ ଗୁରୁବାର କୋରୋନା ଟିକାର ପ୍ରଥମ ଡୋଜ୍ ନେଇଥିବା ସୂଚନା ଦେଇଥିଲେ । ଏନେଇ ମେହେଟ୍ଟା କହିଛନ୍ତି, ପୁନିଆଙ୍କୁ ଭ୍ୟାକସିନ ମିଳିପାରିଥିବାରୁ ଖୁସିର କଥା । ମାତ୍ର ଟିକା ପାଇଁ ଅପେକ୍ଷା କରିଥିବା ଅନ୍ୟ ଆଥଲେଟଙ୍କ ପାଇଁ ଏହି ପ୍ରକ୍ରିୟା ସରଳୀକରଣ ହେବା ଉଚିତ ।
