ବାଜିଲା ସବିତାଙ୍କ ସାହାନାଇ, ଅଙ୍କିତକୁ କଲେ ଜୀବନସାଥୀ

ବିବାହ ବନ୍ଧନରେ ବାନ୍ଧି ହୋଇଛନ୍ତି ଭାରତୀୟ ମହିଳା ହକି ଦଳର ଗୋଲରକ୍ଷକ ତଥା ଅଧିନାୟିକା ସବିତା ପୁନିଆ । ସଫ୍ଟୱେୟାର ଇଞ୍ଜିନିୟର ଅଙ୍କିତଙ୍କ ହାତ ଧରିଛନ୍ତି ସବିତା । ଅଧିକ ପଢନ୍ତୁ

ଚଣ୍ଡିଗଡ: ହାତକୁ ଦୁଇ ହାତ ହୋଇଛନ୍ତି ଭାରତୀୟ ମହିଳା ହକି ଦଳର ଅଧନାୟିକା ସବିତା ପୁନିଆ । ବିବାହ ବନ୍ଧନରେ ବାନ୍ଧି ହୋଇଛନ୍ତି ସବିତା । ହରିୟାଣା ସୋନପତ ବାସିନ୍ଦା ତଥା କାନାଡାରେ ଏକ ବ୍ୟାଙ୍କରେ ସଫ୍ଟୱେୟାର ଇଞ୍ଜିନିୟର ଥିବା ଅଙ୍କିତ ବାଲହରାଙ୍କୁ ଜୀବନସାଥୀ କରିଛନ୍ତି 32 ବର୍ଷୀୟ ସବିତା ପୁନିଆ । ଚଣ୍ଡିଗଡର ପାର୍କ ପ୍ଲାଜା ହୋଟେଲରେ ବିବାହ କାର୍ଯ୍ୟକ୍ରମ ଅନୁଷ୍ଠିତ ହୋଇଛି । ଉଭୟଙ୍କ ପରିବାର ସଦସ୍ୟ ଓ କିଛି ସ୍ବତନ୍ତ୍ର ଅତିଥି ଗହଣରେ ବିବାହ ସମ୍ପନ୍ନ ହୋଇଛି ।

ହରିୟାଣାର ସିରସା ତଥା ସବିତା ଭାରତୀୟ ମହିଳା ହକି ଦଳର ଅଧିନାୟିକା ଭାର ତୁଲାଉଛନ୍ତି । କ୍ରୀଡା ପ୍ରତି ଶ୍ରେଷ୍ଠ ଅବଦାନ ପାଇଁ ସେ ଅର୍ଜୁନ ପୁରସ୍କାର ପାଇଛନ୍ତି । ଏହାସହ ହକି ଇଣ୍ଡିଆ 5ମ ବାର୍ଷିକ ସମାରୋହରେ ମହିଳା ହକି ଦଳର ସବିତା ପୁନିଆ 2022ରେ ଶ୍ରେଷ୍ଠ ଖେଳାଳି ବିବେଚିତ ହୋଇଛନ୍ତି । ତାଙ୍କୁ 25 ଲକ୍ଷ ଟଙ୍କା ଅର୍ଥରାଶି ସହ ଟ୍ରଫି ପ୍ରଦାନ କରାଯାଇଥିଲା । ହକିରେ ସବିତାଙ୍କର ଉଲ୍ଲେଖନୀୟ ଅବଦାନ ରହିଛି ।

ବିବାହ ପରେ ବର୍ତ୍ତମାନ ସବିତା ଭାରତରେ ରହିବେ । ଆଗକୁ 2024 ଅଲମ୍ପିକ୍ସ ଥିବାରୁ ତାଙ୍କର ସମସ୍ତ ଫୋକସ ଅଲମ୍ପିକ୍ସ ଉପରେ ରହିବ । ବିବାହକୁ ନେଇ ସବିତା କହିଛନ୍ତି, ''ବିବାହ ପାଇଁ ଅଳ୍ପ ସମୟ ମିଳିଛି । 12 ଏପ୍ରିଲରେ ଅଷ୍ଟ୍ରେଲିଆ ଗସ୍ତ ଲାଗି 33 ଜଣିଆ ଦଳରେ ଯୋଗ ଦେବି ।'' 2003-04ରେ ସବିତା ଖେଳିବା ଆରମ୍ଭ କରିଥିଲେ । 2007ରେ ଭାରତୀୟ ସିନିୟର ନ୍ୟାସନାଲ ହକି ଦଳରେ ସାମିଲ ହୋଇଥିଲେ । 2011ରେ ସବିତା ଅନ୍ତର୍ଜାତୀୟ ସ୍ତରରେ ଖେଳିବା ଆରମ୍ଭ କରିଥିଲେ । ଏହାପରେ ସଫଳତା ପରେ ସଫଳତା ହାସଲ କରିଥିଲେ ସବିତା ।

ଯୌତୁକ ନେଲେ ମାତ୍ର 1 ଟଙ୍କା: ଯୌତୁକ ବାବଦରେ ଅଙ୍କିତଙ୍କ ପରିବାର ପକ୍ଷରୁ ମାତ୍ର ଏକ ଟଙ୍କା ନିଆଯାଇଥିବା ସବିତାଙ୍କ ପିତା ମହେନ୍ଦ୍ର ପୁନିଆ ସୂଚନା ଦେଇଛନ୍ତି । ସବିତା ବର୍ତ୍ତମାନ ଭାରତୀୟ ଦଳର ଆଗାମୀ ଅଷ୍ଟ୍ରେଲିଆ ଗସ୍ତ ଲାଗି 33 ଜଣିଆ ଦଳରେ ସ୍ଥାନ ପାଇଛନ୍ତି । 2024 ଅଲମ୍ପିକ୍ସ ପର୍ଯ୍ୟନ୍ତ ସେ ସ୍ବାମୀଙ୍କ ସହ କାନାଡା ଯିବାର କୌଣସି ଯୋଜନା ନଥିବା ସବିତାଙ୍କ ପରିବାର ପକ୍ଷରୁ ସୂଚନା ମିଳିଛି । ହକି ଇଣ୍ଡିଆ ସଭାପତି ପଦ୍ମଶ୍ରୀ ଦିଲୀପ ତିର୍କୀ ଅତିଥିଭାବେ ବିବାହରେ ଯୋଗ ଦେଇ ନବଦମ୍ପତିଙ୍କୁ ଶୁଭେଚ୍ଛା ଜଣାଇଛନ୍ତି । ଏ ନେଇ ନିଜ ଟ୍ବିଟର ଆକାଉଣ୍ଟରେ ଫଟୋ ପୋଷ୍ଟ କରି ଉଭୟଙ୍କୁ ଶୁଭେଚ୍ଛା ଜଣାଇଛନ୍ତି ହକି ଇଣ୍ଡିଆ ସଭାପତି ।