ଭୁବନେଶ୍ବର: ଅନ୍ତର୍ଜାତୀୟ ଆଥଲେଟ ପୂର୍ଣ୍ଣିମା ହେମ୍ବ୍ରମ୍ ବନାମ କ୍ରୀଡାମନ୍ତ୍ରୀ ତୁଷାରକାନ୍ତି ବେହେରା । କିଏ କହୁଛି ସତ ? କ୍ରୀଡୀମନ୍ତ୍ରୀ ନା ପୂର୍ଣ୍ଣିମା । ଇଣ୍ଟରନ୍ୟାସନାଲ ଇଭେଣ୍ଟ ପ୍ରସ୍ତୁତି ପାଇଁ ରାଜ୍ୟ ସରକାର କୌଣସି ସହାୟତା ଯୋଗାଇ ଦେଉନଥିବା ପୂର୍ଣ୍ଣିମା ଅଭିଯୋଗ କରୁଥିବା ବେଳେ ଏହାକୁ ଖଣ୍ଡନ କରିଛନ୍ତି କ୍ରୀଡାମନ୍ତ୍ରୀ । ଏନେଇ ମଙ୍ଗଳବାର ସକାଳେ ଆମେ ଖବର ପ୍ରସାରଣ କଲା ପରେ ପ୍ରତିକ୍ରିୟା ରଖିଛନ୍ତି କ୍ରୀଡାମନ୍ତ୍ରୀ ତୁଷାରକାନ୍ତି ବେହେରା ।
ଶୁଣନ୍ତୁ କଣ କୁହନ୍ତି ପୂର୍ଣ୍ଣିମା-
ତେବେ ଆଜି ସକାଳେ ପୂର୍ଣ୍ଣିମାଙ୍କୁ ଭେଟିଥିଲେ ଆମ ପ୍ରତିନିଧି । ପୂର୍ଣ୍ଣିମାଙ୍କ କହିବା କଥା ସରକାରଙ୍କ ପକ୍ଷରୁ ତାଙ୍କୁ କୌଣସି ପ୍ରୋତ୍ସାହନ ମିଳିନାହିଁ । ଏପଟେ କେହି ପ୍ରୟୋଜକ ମିଳିନଥିବା ସେ କହିଥିଲେ । କିଛି ସରକାରୀ ସାହାଯ୍ୟ ପାଇଁ ତାଙ୍କୁ ଅନେକ ଥର ଦୌଡିବାକୁ ପଡିଥାଏ । ଯାହା ଆର୍ଥିକ ସହାୟତା ଦରକାର ତାହା ବହୁ ବିଳମ୍ବରେ ମିଳିଥାଏ ।
ପୂର୍ଣ୍ଣିମା ପୁଣି କହିଛନ୍ତି, "ମୁଁ ଚାକିରୀ କରିଛି ସତ, କିନ୍ତୁ ରେକର୍ଡରେ ତାହା ନାହିଁ । ମତେ ମିଳୁଥିବା ଦରମା ମୋ ଅଭ୍ୟାସ ପାଇଁ ଯଥେଷ୍ଟ ନୁହେଁ । କାରଣ ବିଦେଶରେ ଜଣେ ଭଲ କୋଚ ଓ ଫିଜିଓଙ୍କ ସହ ଟ୍ରେନିଂ ନେବାକୁ ହେଲେ ପାଖାପାଖି 1ରୁ 2 ଲକ୍ଷ ଟଙ୍କା ଖର୍ଚ୍ଚ ହୋଇଥାଏ । ତା’ଛଡା ଏବେ ଯେଉଁ ଚାକିରୀ କରୁଛି ସେଥିରେ ବିଦେଶ ଯାଇ ଚାକିରୀ କରିବା ଅସମ୍ଭବ ।"
ଶୁଣନ୍ତୁ କଣ କୁହନ୍ତି ମନ୍ତ୍ରୀ-
ଅନ୍ୟପଟେ ପୂର୍ଣ୍ଣିମାଙ୍କ ମନ୍ତବ୍ୟକୁ ଖଣ୍ଡନ କରି କ୍ରୀଡାମନ୍ତ୍ରୀ କହିଛନ୍ତି, "କୌଣସି ଖେଳାଳିଙ୍କୁ ଏକ ନିର୍ଦ୍ଦିଷ୍ଟ ଭାବେ ଚାକିରୀ ଦେବାର ନିୟମ ନାହିଁ । ସେ ଏବେ ରେଳବାଇରେ ଚାକିରୀ କରୁଛନ୍ତି । ସରକାର ସବୁବେଳେ ତାଙ୍କୁ ସହାୟତା କରୁଛନ୍ତି । ସେ ଯେଉଁ ନିର୍ଦ୍ଦିଷ୍ଟ ସଂସ୍ଥା କଥା କହୁଛନ୍ତି ସେମିତି ଚାକିରୀ ଦେବାର କୌଣସି ସୁବିଧା ନାହିଁ । କାରଣ ସରକାର ଆଥଲେଟଙ୍କୁ ଚାକିରୀ ଦିଅନ୍ତି । ଆଥଲେଟ ନିଜ ଇଚ୍ଛାରେ କୌଣସି ସଂସ୍ଥାରେ ଚାକିରୀ କରିବାକୁ ଚାହିଁଲେ ସେମିତି ସୁବିଧା ନାହିଁ । ସରକାର ସମସ୍ତ ସହାୟତା ଦେଇଛନ୍ତି । ଗାଇଡଲାଇ ଅନୁସାରେ ସମସ୍ତ ପ୍ରକ୍ରିୟା ପାଳନ କରିଛନ୍ତି ।"
ତେବେ ପୂର୍ଣ୍ଣିମାଙ୍କ କହିବା କଥା, ଯଦି ମୁଖ୍ୟମନ୍ତ୍ରୀ ଏହାକୁ ବିଚାରକୁ ନେଇ ତାଙ୍କର ପ୍ରସ୍ତୁତି ପାଇଁ ଆନୁଷଙ୍ଗିକ ସାହାଯ୍ୟ ଓ ସହାୟତା ଯୋଗାଇ ଦିଅନ୍ତି, ତେବେ ସେ ଆଗାମୀ ବିଶ୍ବ ଚମ୍ପିଆନସିପ୍ ଓ ଅଲମ୍ପିକ୍ସରେ ଅଂଶଗ୍ରହଣ କରିବା ପାଇଁ ପ୍ରସ୍ତୁତି କରିପାରିବେ ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
