ନୂଆଦିଲ୍ଲୀ: କୁସ୍ତିଯୋଦ୍ଧା ସାଗର ଧନକର ହତ୍ୟା ମାମଲାରେ ବଢୁଛି ଦୁଇଥରର ଅଲମ୍ପିକ ପଦକ ବିଜେତା କୁସ୍ତିଯୋଦ୍ଧା ସୁଶୀଲ କୁମାରଙ୍କ ଅଡୁଆ । ଗତ 24ରେ ସୁଶୀଲଙ୍କୁ ଗିରଫ କରିଥିଲା ଦିଲ୍ଲୀ ପୋଲିସ । ଏହାର 9 ଦିନ ପରେ ସୁଶୀଲଙ୍କ ଅସ୍ତ୍ରଶସ୍ତ୍ର ଲାଇସେନ୍ସ(ଆର୍ମ ଲାଇସେନ୍ସ) ବାତିଲ କରିଛି ଦିଲ୍ଲୀ ପୋଲିସ ।
ସୂଚନା ଅନୁଯାୟୀ, 2012ରେ ସୁଶୀଲଙ୍କୁ ଅସ୍ତ୍ରଶସ୍ତ୍ର ଲାଇସେନ୍ସ ମିଳିଥିଲା । ତେବେ ଦିଲ୍ଲୀ ପୋଲିସ ଏହି ଲାଇସେନ୍ସକୁ ବନ୍ଦ କରିବାକୁ ନୋଟିସ ପଠାଇଥିଲା । 10 ଦିନ ମଧ୍ୟରେ ପୋଲିସ ନିକଟରେ ଉତ୍ତର ରଖିବାକୁ ପୋଲିସ ସମୟ ଦେଇଥିଲା । ତେବେ ଲାଇସେନ୍ସ ପ୍ରତ୍ୟାହର ନହୋଇଥିବା ଯୋଗୁଁ ପୋଲିସ ବାତିଲ କରିଛି ।
ମେ 4 ରାତିରେ ଛତ୍ରଶାଲ ଷ୍ଟାଡିୟମରେ ମାରପିଟ ବେଳେ ଯୁବ କୁସ୍ତିଯୋଦ୍ଧା ସାଗରଙ୍କ ମୃତ୍ୟୁ ହୋଇଥିଲା ।
ଏହାପରେ ହତ୍ୟା ଘଟଣା ସଂପୃକ୍ତି ନେଇ ସୁଶୀଲ କୁମାରଙ୍କୁ ଗିରଫ କରିବାକୁ ପୋଲିସ ନୋଟିସ ଜାରି କରିଥିଲା । ମାତ୍ର ସୁଶୀଲ ଫେରାର ହୋଇଯାଇଥିଲେ । ଶେଷରେ 18ଦିନର ଲୁଚକାଳି ପରେ ମେ 24ରେ ଦିଲ୍ଲୀ ପୋଲିସର ସ୍ପେଶାଲ ସେଲ ସୁଶୀଲ ଓ ତାଙ୍କ ସହଯୋଗୀ ଅଜୟଙ୍କୁ ଗିରଫ କରିବାକୁ ସଫଳ ହୋଇଥିଲା ।
ରବିବାର କ୍ରାଇମବ୍ରାଞ୍ଚ, ସୁଶୀଲ କୁମାରଙ୍କୁ ଉତ୍ତରାଖଣ୍ଡର ହରିଦ୍ବାର ନେବା ସହ ଆତ୍ମଗୋପନ କରିଥିବା ସ୍ଥାନରେ ଯାଞ୍ଚ କରୁଛି । ସୁଶୀଲ ଘଟଣା ଦିନ ପିନ୍ଧିଥିବା ପୋଷାକ ଓ ହରିଦ୍ବାରରେ ଥିବା ମୋବାଇଲ ଫୋନକୁ ଖୋଜୁଛି ପୋଲିସ ।
ଏହି ମାମଲାରେ ସଂପୃକ୍ତ ଥିବା 9ଜଣଙ୍କୁ ଏଯାବତ ଦିଲ୍ଲୀ ପୋଲିସ ଗିରଫ କରିସାରିଛି ।
ସୁଶୀଲ କୁମାର 2008 ବେଜିଂ ଅଲମ୍ପିକ ଗେମ୍ସରେ ବ୍ରୋଞ୍ଜ ଓ 2012 ଲଣ୍ଡନ ଅଲମ୍ପିକ ଗେମ୍ସରେ ରୌପ୍ୟ ପଦକ ଜିତିଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
