ହାଙ୍ଗଝୌ: ଜାରି ରହିଥିବା ଏସିଆନ୍ ଗେମ୍ସ-୨୦୨୩ରେ ଭାରତୀୟ ସୁଟର୍ଙ୍କ ଦମଦାର ପ୍ରଦର୍ଶନ ଜାରି ରହିଛି । ଆଜି ଅଷ୍ଟମ ଦିନରେ ସୁଟିଂରେ ଭାରତୀୟ ପୁରୁଷ ଦଳ ଗୋଲ୍ଡ ହାତେଇଛନ୍ତି । ପୁରୁଷ ସୁଟିଂ ଦଳରେ କିନ୍ନାନ ଚେନାଇ, ଜୋରାବର ସିଂହ ଓ ପୃଥ୍ବୀରାଜ ଟୋଣ୍ଡିମନ ସ୍ବର୍ଣ୍ଣ ପଦକ ହାସଲ କରିଥିଲେ । ଏଥିରେ ଭାରତ ପ୍ରତିଦ୍ବନ୍ଦ୍ବୀ କୁଏତ୍ ଓ ଚୀନ୍କୁ ପଛରେ ପକାଇ ଗୋଲ୍ଡ ମେଡାଲ ହାସଲ କରିଛି । ଭାରତ ସୁଟିଂରେ ଏପର୍ଯ୍ୟନ୍ତ ୭ଟି ସ୍ବର୍ଣ୍ଣ, ୯ଟି ରୌପ୍ୟ ଏବଂ ୬ଟି ବ୍ରୋଞ୍ଜ ସହ ମୋଟ ୨୨ଟି ପଦକ ହାସଲ କରିସାରିଲାଣି । ଏହି ସ୍ବର୍ଣ୍ଣ ଜିତିବା ପରେ ଚେନାଇ ଓ ସନ୍ଧୁ ବ୍ୟକ୍ତିଗତ ଭାବେ ଫାଇନାଲ୍ ଖେଳିବାକୁ ମଧ୍ୟ ଯୋଗ୍ୟତା ହାସଲ କରିଥିଲେ । ତେବେ ବ୍ୟକ୍ତିଗତ ବିଭାଗରେ କିନ୍ତୁ କିନ୍ନାନ ଚେନାଇଙ୍କୁ ବ୍ରୋଞ୍ଜରେ ସନ୍ତୁଷ୍ଟ ହେବାକୁ ପଡ଼ିଛି ।
ଏସିଆନ୍ ଗେମ୍ସ-୨୦୨୩ରେ ଆଜି ଆରମ୍ଭରୁ ସୁଟିଂରେ ମହିଳା ଟ୍ରାପ୍ ଟିମ୍ ରୌପ୍ୟ ପଦକ ହାସଲ କରିଥିଲା । ରାଜେଶ୍ବର କୁମାରୀ, ମନୀସା କୀର ଓ ପ୍ରୀତି ରଜାକ ୩୩୭ ପଏଣ୍ଟ ପାଇ ରନର୍ସ୍ ଅପ୍ ହୋଇଥିବାବେଳେ ଚୀନ ଏହି ମୁକାବିଲା ଜିତି ନେଇଥିଲା । ଏସିଆନ୍ ଗେମ୍ସରେ ଭାରତୀୟ ସୁଟରମାନେ ପଦକ ଜିତାଇବାରେ ଗୁରୁତ୍ବପୂର୍ଣ୍ଣ ଭୂମିକା ନିର୍ବାହ କରିଛନ୍ତି । ପୂର୍ବତନ ବିଶ୍ ଚମ୍ପିଆନ୍ ରୁଦ୍ରାକ୍ଷ ପାଟିଲ ଓ ଅଲିମ୍ପିଆନ ଐଶ୍ବର୍ଯ୍ୟା ପ୍ରତାପ ସିଂହ ତୋମାରଙ୍କ ନେତୃତ୍ବରେ ଭାରତୀୟ ମହିଳା ସୁଟିଂ ଟିମ୍ ଏସିଆନ୍ ଗେମ୍ସ ଖେଳୁଛି । ଦଳରେ ୩୩ ଖେଳାଳି ରାଇଫଲ, ପିସ୍ତଲ ଓ ସଟ୍ଗନ୍ ଇଭେଟଣ୍ଟରେ ପ୍ରତିଯୋଗିତା କରୁଛନ୍ତି । ତେବେ ଏସିଆନ୍ ଗେମ୍ସ ଇତିହାସରେ ଭାରତ ଏଥର ସବୁଠାରୁ ଭଲ ପ୍ରଦର୍ଶନ କରି ଇତିହାସ ରଚିଛି । ଏହା ପୂର୍ବରୁ ଭାରତ କେବଳ ସୁଟିଂରେ ୨୨ଟି ମେଡାଲ ଜିତିନଥିଲା ।
ସୁଟିଂରେ ଭାରତ ପକ୍ଷରୁ ଭଲ ପ୍ରଦର୍ଶନ କରିଥିବା ସୁଟରଙ୍କ ମଧ୍ୟରୁ ସରବ୍ଜୋତ ସିଂହ, ଯିଏ ପରୁଷ ୧୦ ମିଟର ଏୟାର ପିସ୍ତଲ ବର୍ଗର ଫାଇନାଲ୍ ମ୍ୟାଚ୍ରେ ଭଲ ସ୍କୋର କରି ସ୍ବର୍ଣ୍ଣ ହାତେଇଛନ୍ତି । ସେହିପରି ଦିବ୍ୟା ଟିଏସ୍ ମହିଳା ବର୍ଗରେ ୧୦ ମିଟର ଏୟାର ପିସ୍ତଲ୍ରେ ରୌପ୍ୟ ପଦକ ହାତେଇଛନ୍ତି । ସୁଟିଂରେ ସ୍ବର୍ଣ୍ଣ ବିଜେତା ହେଲେ ସିଫ୍ଟ କୌର ଶର୍ମା (ମହିଳା ୫୦ ମିଟର ରାଇଫଲ ୩ ପୋଜିସନ), ପଲକ ଗୁଲିଆ (ମହିଳା ୧୦ ମିଟର ଏୟାର ପିସ୍ତଲ), ଐଶ୍ବର୍ଯ୍ୟ ସିଂହ ତୋମାର, ସ୍ବପ୍ନିଲ କୁଶାଲେ ଓ ଅଖିଲ ଶିଓରାନ (ପୁରୁଷ ଟିମ୍ ୫୦ ମିଟର ରାଇଫଲ ୩ ପୋଜିସନ), ମନୁ ଭାକେର, ରିଦମ ସାଙ୍ଗୱାନ, ଈଶା ସିଂହ (୨୪ ମିଟର ସ୍ପୋର୍ଟ୍ସ ପିସ୍ତଲ କାଟେଗୋରୀ)ରେ ସ୍ବର୍ଣ୍ଣ ଜିତିଛନ୍ତି । ସେହିପରି ରୁଦ୍ରାକ୍ଷ ପାଟିଲ, ଐଶ୍ବର୍ଯ୍ୟ ପ୍ରତାପ ସିଂହ ତୋମାର, ଦିବ୍ୟା ସିଂହ ପାୱନରା ପୁରୁଷ ୧୦ ମିଟର ଏୟାର ରାଇଫଲ ବର୍ଗରେ ଭାରତ ପାଇଁ ସ୍ବର୍ଣ୍ଣ ଆଣିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
