ଭୁବନେଶ୍ବର: ବାସ ଆଉ କିଛି ଦିନର ଅପେକ୍ଷା । କଳିଙ୍ଗ ଷ୍ଟାଡିୟମରେ ଆରମ୍ଭ ହେବ ପୁରୁଷ ହକି ସିରିଜ ଫାଇନାଲ ପ୍ରତିଯୋଗିତା । ଏଥିପାଇଁ ଶନିବାର ଦୁଇଟି ବିଦେଶୀ ଦଳ ଆମେରିକା ଓ ଉଜବେକିସ୍ତାନ ଆସି ପହଞ୍ଚିଛନ୍ତି ।
ଆସନ୍ତା 6 ତାରିଖରୁ ଆରମ୍ଭ ହେବାକୁ ଥିବା ଏହି ମ୍ୟାଚରେ ଭାରତ ସମେତ 8ଟି ଦଳ ଭାଗ ନେଉଛନ୍ତି । ଏଥିଲାଗି ଆଉ 2ଟି ବିଦେଶୀ ଦଳ ଆସି ଭୁବନେଶ୍ବରରେ ପହଞ୍ଚିଯାଇଛନ୍ତି ।
ଏହି ଅବସରରେ ଆମେରିକା ଦଳର ଅଧିନାୟକ ଓ କୋଚ ନିଜ ପ୍ରତିକ୍ରିୟାରେ କହିଛନ୍ତି ଯେ, ‘ଏହା ଦଳ ପାଇଁ ଏକ ସୁଯୋଗ । ଯେଉଁଥିରେ ସେମାନେ ବିନା ଚାପରେ ଉନ୍ନତ ପ୍ରଦର୍ଶନ କରି ଦଳର ମାନ୍ୟତାରେ ସୁଧାର ଆଣିବାକୁ ଚେଷ୍ଟା କରିବେ ।’
ସେମାନେ ଆହୁରି କହିଛନ୍ତି ଯେ, ଏହା ଅଲମ୍ପିକ ପାଇଁ କ୍ବାଲିଫାଇଙ୍ଗ ମ୍ୟାଚ ହୋଇଥିବାରୁ ଦଳ ବିପକ୍ଷ ଟିମ ବିରୋଧରେ ଭଲ ପ୍ରଦର୍ଶନ କରିବା ସହିତ ଅଲମ୍ପିକ ଟିକେଟ ହାସଲ ପାଇଁ ସମ୍ପୂର୍ଣ୍ଣ ଚେଷ୍ଟା କରିବେ ।
ମ୍ୟାଚ ଆରମ୍ଭ ହେବାକୁ ଆହୁରି କିଛିଦିନ ବାକି ଥିବାରୁ ଏହା ମଧ୍ୟରେ ଏଠାକାର ଜଳବାୟୁ ସହିତ ଖାପ ଖୁଆଇ ଖେଳ ଉପରେ ମନୋନିବେଶ କରିବାକୁ ସେମାନେ ପ୍ରକାଶ କରିଛନ୍ତି। ସେହିପରି ଉଜବେକିସ୍ଥାନ ଟିମ ମଧ୍ୟ ସମ୍ପୂର୍ଣ୍ଣ ରଣନୀତି ସହ ନିଜ ପ୍ରଦର୍ଶନ ଉପରେ ଗୁରୁତ୍ୱ ଦେଉଥିବା କହିଛି ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
