ରିଓ ଦେ ଜାନିଏରୋ: ଇତିହାସ ରଚିଲେ ବିଶ୍ବ ଫୁଟବଲର ଅନ୍ୟତମ ଶ୍ରେଷ୍ଠ ଫୁଟବଲ ଖେଳାଳି ଲିଓନେଲ ମେସି । ଦୀର୍ଘ 28 ବର୍ଷ ପରେ ବ୍ରାଜିଲକୁ ହରାଇ କୋପା ଆମେରିକା ଟାଇଟେଲ ବିଜେତା ହେଲା ଆର୍ଜେଣ୍ଟିନା । ଆର୍ଜେଣ୍ଟିନା ଫୁଟବଲ ସୁପରଷ୍ଟାର ମେସିଙ୍କ ଏହା ପ୍ରଥମ ବଡ ଅନ୍ତର୍ଜାତୀୟ ଟ୍ରଫି ।
ରିଓ ଦେ ଜାନିଏରୋର ସ୍ଥାନୀୟ ମାରାକାନା ଷ୍ଟାଡିୟମରେ ଆର୍ଜେଣ୍ଟିନା ପାଇଁ ବିଜୟ ଗୋଲ କରିଥିଲେ ଆଞ୍ଜେଲ ଦି ମାରିଆ । 33 ବର୍ଷୀୟ ଭେଟେରାନ ଷ୍ଟ୍ରାଇକର ବ୍ରାଜିଲର ଦୁର୍ବଳ ଡିଫେଣ୍ଡିଂର ଫାଇଦା ଉଠାଇ ଗୋଲକିପରଙ୍କୁ ଚମକା ଦେବାସହ ଅବିଶ୍ବସନୀୟ ଗୋଲ୍ କରିଥିଲେ । ସଂପୂର୍ଣ୍ଣ ଟୁର୍ଣ୍ଣାମେଣ୍ଟରେ ବ୍ରାଜିଲ ପାଇଁ ଏହା ତୃତୀୟ ଗୋଲ ଥିଲା ଯାହାକୁ ଗ୍ରହଣ କରିବାକୁ ଟିମ ବାଧ୍ୟ ହେଇଥିଲା । 1-0ରେ ଆଗୁଆ ହେବାପରେ ଅଧିକ ରକ୍ଷଣାତ୍ମକ ଓ ଯତ୍ନର ସହ ଖେଳିଥିଲା ଆର୍ଜେଣ୍ଟିନା । ବ୍ରାଜିଲର ଫୁଟବଲ ଷ୍ଟାର ନେମାର ଗୋଲ୍ କରିବାକୁ ସମସ୍ତ ପ୍ରୟାସ କରିଥିଲେ ମଧ୍ୟ ବିଫଳ ହୋଇଥିଲେ । ଆର୍ଜେଣ୍ଟିନା ଗୋଲକିପର ଏମିଲିଆନୋ ମାର୍ଟିନେଜ ଜମଜାର ପ୍ରଦର୍ଶନ ସହ ବ୍ରାଜିଲକୁ ନିରାଶ କରିଥିଲେ ।
ଗତ ମ୍ୟାଚ୍ ତୁଳନାରେ ଫାଇନାଲ ମ୍ୟାଚରେ ମେସିଙ୍କ ପ୍ରଦର୍ଶନ ଉତ୍ସାହଜନକ ନଥିଲା । ମ୍ୟାଚର 88ତମ ମିନିଟରେ ବିଚକ୍ଷଣ ମେସି ଏକ ଚମତ୍କାର ଗୋଲ୍ କରିବାକୁ ପ୍ରୟାସ କରିଥିଲେ ମାତ୍ର ବ୍ରାଜିଲ ଗୋଲକିପର୍ ତାଙ୍କୁ ଅଟକାଇଥିଲେ ।
ତେବେ ଏହି ଅନ୍ତର୍ଜାତୀୟ ଟାଇଟେଲ ବିଜୟ ମେସିଙ୍କ ପାଇଁ ସାମାନ୍ୟ ଆଶ୍ବସ୍ତିକର ହୋଇଛି । କାରଣ ଜାତୀୟ ଟିମର ନେତୃତୃ ତାଙ୍କ ହାତରେ ଥିବାବେଳେ ଅନ୍ତର୍ଜାତୀୟ ଟ୍ରଫି ଜିତିବାରେ କ୍ରମାଗତ ବିଫଳ ହେଉଥିଲା ଦେଶ । ଫଳରେ ଫୁଟବଲ ସୁପରଷ୍ଟାରଙ୍କୁ ସମାଲୋଚନାର ଶିକାର ମଧ୍ୟ ହେବାକୁ ପଡିଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
