ଚଣ୍ଡିଗଡ: କ୍ରୀଡା ପୁରସ୍କାର 2020ର ଚୂଡାନ୍ତ ତାଲିକା କ୍ରୀଡା ମନ୍ତ୍ରଣାଳୟ ପକ୍ଷରୁ ଘୋଷଣା ହୋଇସାରିଛି । ଚଣ୍ଡିଗଡର ସନ୍ଦେଶ ଝିଙ୍ଗନ ଅର୍ଜୁନ ଆୱାର୍ଡ ପାଇଁ ମନୋନୀତ ହୋଇଛନ୍ତି । ଏହି ସଫଳତା ପରେ ଇଟିଭି ଭାରତରେ ସନ୍ଦେଶ ନିଜର ପ୍ରତିକ୍ରିୟା ରଖିଛନ୍ତି ।
ଗତ କିଛି ବର୍ଷ ଧରି ଭାରତୀୟ ଫୁଟବଲ ଟିମର ପ୍ରମୁଖ ସଦସ୍ୟ ରହିଛନ୍ତି ସନ୍ଦେଶ । ପ୍ରଭାବୀ ପ୍ରଦର୍ଶନ ବଳରେ ଅନେକ ମ୍ୟାଚରେ ଭାରତକୁ ବିଜୟୀ କରାଇଛନ୍ତି ସନ୍ଦେଶ । ପିଲାଦିନେ ଅଧିକ ପରିମାଣରେ କ୍ରିକେଟ ଖେଳୁଥିଲେ, ମାତ୍ର ବର୍ତ୍ତମାନ ଫୁଟବଲ ଟିମରେ ସେଣ୍ଟର-ବ୍ୟାକ ସ୍ଥାନରେ ଭାରତର ଶ୍ରେଷ୍ଠ ଖେଳାଳି ରହିଛନ୍ତି । ଅର୍ଜୁନ ଆୱାର୍ଡ ପାଇଁ ମନୋନୀତ ହେବାପରେ ସ୍ବପ୍ନ ସତ ହୋଇଛି ବୋଲି କହିଛନ୍ତି ।
କ୍ରୀଡା କ୍ଷେତ୍ରରେ ଦେଶର ସମ୍ମାନଜନକ ପୁରସ୍କାର ବିଜେତା ହେବାକୁ ସବୁ ଖେଳାଳିଙ୍କ ସ୍ବପ୍ନ ଥାଏ ।
ମାତ୍ର 15-16 ବର୍ଷର ହୋଇଥିବାବେଳେ ଅର୍ଜୁନ ପୁରସ୍କାରର ସ୍ବପ୍ନ ଦେଖିଥିଲେ । ରାଷ୍ଟ୍ରପତି ଭବନରୁ ପୁରସ୍କାର ଜିତି ବାପାମାଆଙ୍କୁ ଦେଖାଇବାପାଇଁ ଚିନ୍ତା କରିଥିଲେ । ଚଳିତ ବର୍ଷ ସ୍ବପ୍ନ ସତ ହୋଇଥିବା ଯୋଗୁଁ ବେଶ ଖୁସି ଅଛନ୍ତି ବୋଲି ସନ୍ଦେଶ କହିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
