ନୂଆଦିଲ୍ଲୀ: ଫିଫା ବିଶ୍ବକପ କ୍ବାଲିଫାୟରରୁ ଓହରିଗଲା ଉତ୍ତର କୋରିଆ। ଏହାକୁ ନେଇ ଏସିଆନ ଫୁଟବଲ କନଫରେଡସନ ପକ୍ଷରୁ ସୂଚନା ଦିଆଯାଇଛି । ଫଳରେ 2022 କତାର ଫୁଟବଲ ବିଶ୍ବକପରେ ଉତ୍ତର କୋରିଆ ଦଳକୁ ଦେଖିବାକୁ ମିଳିବ ନାହିଁ । ଚଳିତ ବର୍ଷ ଜୁନ ମାସରେ କତାର ଫିଫା ବିଶ୍ବକପ ପାଇଁ ଯୋଗ୍ୟତା ପର୍ଯ୍ୟାୟ ମ୍ୟାଚ ଆରମ୍ଭ ହେବାକୁ ଥିଲା ।
ଖାଲି ସେତିକି ନୁହେଁ ଚୀନରେ ହେବାକୁ ଥିବା ଏସିଆନ କପ 2023ରୁ ମଧ୍ୟ ଉତ୍ତର କୋରିଆ ଓହରି ଯାଇଛି । ଏହାକୁ ନେଇ ଏସିଆନ ଫୁଟବଲ କନଫରେଡସନ କହିଛି ଯେ, "ଜୁନ ମାସରେ ହେବାକୁ ଥିବା କତାର ଫିଫା ବିଶ୍ବକପ 2022 ଫୁଟବଲର ଯୋଗ୍ୟତା ପର୍ଯ୍ୟାୟ ମ୍ୟାଚରୁ ଓହରି ଯାଇଛି କୋରିଆନ ଫୁଟବଲ ଆସୋସିଏସନ । ଏହାସହିତ 2023ରେ ଚୀନରେ ହେବାକୁ ଥିବା ଏସିଆନ କପରୁ ମଧ୍ୟ କୋରିଆନ ଫୁଟବଲ ଆସୋସିଏସନ ଓହରି ଯାଇଛନ୍ତି ।"
ବର୍ତ୍ତମାନ ଏହାକୁ ନେଇ ଫିଫାର ପ୍ରତିଯୋଗିତା କମିଟିକୁ ଜଣାଇ ଦିଆଯିବ । ଫିଫା ବିଶ୍ବକପ ଯୋଗ୍ୟତା ପର୍ଯ୍ୟାୟ ମ୍ୟାଚ ପାଇଁ ଗ୍ରୁପ ଏଚରେ ରହିଥିଲା ଉତ୍ତର କୋରିଆ । ଏହି ଗ୍ରୁପରେ ଲେବାନନ ଓ ଶ୍ରୀଲଙ୍କା ଭଳି ଦଳ ମଧ୍ୟ ସାମିଲ ଥିଲା । ଜୁନ ମାସରେ ହେବାକୁ ଥିବା ଏହି ଯୋଗ୍ୟତା ପର୍ଯ୍ୟାୟ ପାଇଁ କତାର ଗସ୍ତ କରିବ ଭାରତୀୟ ଫୁଟବଲ ଦଳ । ଏହି ସମୟରେ ଭାରତକୁ 10 ଦିନ ପାଇଁ କ୍ବାରେଣ୍ଟିନରେ ରହିବା ଆବଶ୍ୟକତା ନାହିଁ ।
ଏହାର କାରଣ ସମସ୍ତ ଭାରତୀୟ ଫୁଟବଲ ଖେଳାଳି କତାର ଗସ୍ତ ପୂର୍ବରୁ ଟିକା ନେବେ ଓ ବାୟୋବବଲରେ ରହିବେ । କତାରରେ ପହଞ୍ଚିବା ମାତ୍ରେ ଭାରତୀୟ ଦଳ ଅଭ୍ୟାସ ଆରମ୍ଭ କରି ପାରିବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
