କଟକ: ଟିମ ଓଡିଶାର ରଣଜୀ ଅଭିଯାନ(Ranji Trophy 2022) ଶେଷ ହୋଇଛି । ଲିଗ ପର୍ଯ୍ୟାୟରେ ବିନା ବିଜୟରେ ଅଭିଯାନ ଶେଷ କରିଛି ଟିମ ଓଡିଶା। ଚଳିତ ରଣଜୀ ଟ୍ରଫି ଟୁର୍ନାମେଣ୍ଟ ୨୦୨୨ର ଗ୍ରୁପ ଡି' ରେ ଥିବା ଟିମ ଓଡିଶାକୁ ଖାଲି ହାତରେ ଫେରିବାକୁ ପଡିଛି । ଶୁଭ୍ରାଂଶୁ ସେନାପତିଙ୍କ ନେତୃତ୍ବରେ ଖେଳିଥିବା ଓଡିଶା ଟିମ ୩ଟି ମ୍ୟାଚରୁ ଗୋଟିଏ ବି ମ୍ୟାଚ୍ରେ ବିଜୟୀ ହୋଇ ନପାରି ନିରାଶ କରିଛି । ଯାହାଦ୍ବାରା ରଣଜୀ ଲିଗ ପର୍ଯ୍ୟାୟରୁ ହିଁ ବିଦାୟ ନେଇଛି ।
କୋଭିଡ କଟକଣା ଯୋଗୁଁ ଦୀର୍ଘ ଦୁଇ ବର୍ଷର ବ୍ୟବଧାନ ପରେ ରଣଜୀ ଟ୍ରଫି ଟୁର୍ନାମେଣ୍ଟ ଖେଳାଯାଉଛି। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡର(BCCI) ଏହି ମେଗା ଘରୋଇ ଟୁର୍ନାମେଣ୍ଟ ପୂର୍ବରୁ 20 ଜଣିଆ ଯୁବ ଓ ଅଭିଜ୍ଞ ଖେଳାଳିଙ୍କ ସହିତ ଟିମ ଘୋଷଣା କରିଥିଲା ଓଡିଶା କ୍ରିକେଟ ଆସୋସିଏସନ(OCA)। ରଣଜୀ ଟୁର୍ନାମେଣ୍ଟ ତାରିଖ ଘୋଷଣା ହେବା ପୂର୍ବରୁ ଭଲ ପ୍ରସ୍ତୁତି କରିଥିଲା ଓଡିଶା ଟିମ। ମାତ୍ର ଅହମ୍ମଦାବାଦର ନରେନ୍ଦ୍ର ମୋଦି ଷ୍ଟାଡିୟମରେ ଟିମର ସବୁ ରଣନୀତି ଫେଲ୍ ମାରିଥିଲା ।
