ନୂଆଦିଲ୍ଲୀ: ଜାତୀୟ କ୍ରିକେଟ ଏକାଡେମୀ (NCA)ର ବର୍ତ୍ତମାନ ମୁଖ୍ୟ ଥିବା ରାହୁଲ ଦ୍ରାବିଡ ଟିମ ଇଣ୍ଡିଆର ମୁଖ୍ୟ କୋଚ୍ ପଦ ପାଇଁ ଆବେଦନ କରିଛନ୍ତି । ଦ୍ରାବିଡଙ୍କ ଆବେଦନ ପରେ କ୍ରିକେଟ ପରାମର୍ଶଦାତା କମିଟିର କାମ ସହଜ ହୋଇଯାଇଛି, କାରଣ ଦ୍ରାବିଡଙ୍କ ପରି ବଡ ନାମ ଦୌଡରେ ନାହିଁ । ଟିମ ଇଣ୍ଡିଆର ମୁଖ୍ୟ କୋଚ୍ ପଦ ପାଇଁ ରାହୁଲ ଦ୍ରାବିଡ, BCCI ଅଧ୍ୟକ୍ଷ ସୌରଭ ଗାଙ୍ଗୁଲି ଓ ସମ୍ପାଦକ ଜୟ ଶାହାଙ୍କ ପ୍ରଥମ ଓ ଏକମାତ୍ର ପସନ୍ଦ କୁହାଯାଉଛି ।
BCCIର ଜଣେ ବରିଷ୍ଠ ଅଧିକାରୀ ମଙ୍ଗଳବାର ଏହା ସ୍ପଷ୍ଟ କରିଛନ୍ତି ଯେ, ରାହୁଲ ଔପଚାରିକ ଭାବେ ମୁଖ୍ୟ କୋଚ୍ ପାଇଁ ଶେଷ ଦିନରେ ଆବେଦନ କରିଛନ୍ତି । ଏଥିସହ ଦ୍ରାବିଡଙ୍କ NCA ସାଥୀ ପରାସ ମହାମ୍ବ୍ରେ ଓ ଫିଲ୍ଡିଂ କୋଚ୍ ପାଇଁ ଅଭୟ ଶର୍ମା ପୂର୍ବରୁ ଆବେଦନ କରିସାରିଛନ୍ତି ।
ନିକଟରେ ଦୁବାଇରେ ଦ୍ରାବିଡ ଆଇପିଏଲ ଫାଇନାଲ ମୁକାବିଲା ଅବସରରେ BCCIର ବରିଷ୍ଠ ଅଧିକାରୀଙ୍କ ସହ ଆଲୋଚନା କରିଥିଲେ । ଗାଙ୍ଗୁଲି ଓ ଶାହ ଟି-୨୦ ବିଶ୍ବକପ ପରେ କୋଚ୍ ଭାର ସମ୍ଭାଳିବାକୁ କହିଥିଲେ ।
ଟି-୨୦ ବିଶ୍ବକପ ପରେ ଟିମ୍ ଇଣ୍ଡିଆ ମୁଖ୍ୟ କୋଚ୍ ରବି ଶାସ୍ତ୍ରୀଙ୍କ କାର୍ଯ୍ୟକାଳ ଶେଷ ହୋଇଯିବ। ଶାସ୍ତ୍ରୀ ମଧ୍ୟ କହିଥିଲେ ସେ କୋଚ୍ ପଦବୀ ପାଇଁ ପୁନର୍ବାର ଆବେଦନ କରିବେ ନାହିଁ। ଶାସ୍ତ୍ରୀଙ୍କ ବ୍ୟତୀତ ବୋଲିଂ କୋଚ୍ ଭରତ ଅରୁଣ ଓ ଫିଲ୍ଡିଂ କୋଚ୍ ଆର୍ ଶ୍ରୀଧରଙ୍କର କାର୍ଯ୍ୟକାଳ ମଧ୍ୟ ଟି-୨୦ ବିଶ୍ବକପ ପରେ ଶେଷ ହୋଇଯିବ।
ଅନ୍ୟପଟେ NCA ମୁଖ୍ୟ ପାଇଁ ଭିଭିଏସ ଲକ୍ଷ୍ମଣ ଆଗ୍ରହ ଦେଖାଇଥିବା କୁହାଯାଉଛି । ଏପରି ହୋଇଥିଲେ ବୋର୍ଡ, ଲକ୍ଷ୍ମଣଙ୍କ ସହ ସଂପର୍କ କରିବା ସମ୍ଭାବନା ରହିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
