ମୁମ୍ବାଇ: ବିସିସିଆଇକୁ ମିଳିଛି ନୂଆ ବସ୍ । ଭାରତର ପୂର୍ବତନ କ୍ରିକେଟର ରୋଜର ବିନ୍ନି ( Roger Binny ) ହୋଇଛନ୍ତି ବିସିସିଆଇର ନୂଆ ସଭାପତି । ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡର ୯୧ ତମ ବାର୍ଷିକ ସାଧାରଣ ବୈଠକରେ ଭେଟେରାନ କ୍ରିକେଟର ରୋଜର ବିନ୍ନିଙ୍କୁ ସଭାପତି ପଦରେ ନିଯୁକ୍ତ କରାଯାଇଛି । ତେବେ ଏହି ଭେଟେରାନ କ୍ରିକେଟର ସଭାପତି ପଦରେ ନିଯୁକ୍ତ ହେବା ପରେ କହିଛନ୍ତି କି ସେ କ୍ରିକେଟରଙ୍କ ଆହତ ସମସ୍ୟାର ସମାଧାନକୁ ନେଇ ଅଧିକ ଗୁରୁତ୍ବ ଦେବେ ।
ଆଜି ( ମଙ୍ଗଳବାର ) ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡର ୯୧ ତମ ବାର୍ଷିକ ସାଧାରଣ ବୈଠକ ମୁମ୍ବାଇରେ ଅନୁଷ୍ଠିତ ହୋଇଯାଇଛି । ଏହି ବୈଠକରେ ବିଦ୍ଧିବଦ୍ଧ ଭାବରେ ରୋଜର ବିନ୍ନି ବିସିସିଆଇର ୩୬ ତମ ନୂଆ ସଭାପତି ହୋଇଛନ୍ତି । ବିନ୍ନି ବିସିସିଆଇ ଅଧ୍ୟକ୍ଷ ପାଇଁ ନାମାଙ୍କନ ଦାଖଲ କରିଥିବା ଏକମାତ୍ର ପ୍ରତିଦ୍ବନ୍ଦ୍ବୀ ଥିଲେ । ତେବେ ବିନ୍ନି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡର ସଭାପତି ଭାବରେ ନିଯୁକ୍ତ ହେବା ପରେ ଗଣମାଧ୍ୟମ ଆଗରେ ତାଙ୍କର ପ୍ରଥମ ପ୍ରତିକ୍ରିୟା ରଖିଥିଲେ । ସେ କହିଛନ୍ତି ଯେ " ମୁଁ ମୁଖ୍ୟତଃ ଦୁଇଟି ଜିନିଷ ଉପରେ ଧ୍ୟାନ କେନ୍ଦ୍ରିତ କରିବାକୁ ଚାହୁଁଛି । ପ୍ରଥମେ କ୍ରିକେଟରଙ୍କ ଆହାତ ସମସ୍ୟାର ସମାଧାନ ବାଟ ବାହାର କରିବାକୁ ଚାହିଁବି । ଫାଷ୍ଟ ବୋଲର ଜଶପ୍ରିତ ବୁମରା ବିଶ୍ବକପ ଆରମ୍ଭ ହେବା ପୂର୍ବରୁ ଆହତ ହୋଇଗଲେ । ଯାହା ଫଳରେ ଦଳର ସବୁ ଯୋଜନା ପ୍ରଭାବିତ ହୋଇଛି । ସେହିପରି ମୁଁ ଦ୍ବିତୀୟରେ ପିଚ୍ ଉପରେ ଗୁରୁତ୍ବ ଦେବାକୁ ଚାହୁଁଛି ।"
ଭାରତର ଏହି ପୂର୍ବତନ କ୍ରିକେଟର 1883 ବିଶ୍ବ ବିଜୟୀ ଭାରତୀୟ କ୍ରିକେଟ ଟିମର ସଦସ୍ୟ ଥିଲେ । ସେତେବେଳର ଧୂଆଁଧାର ପେସ୍ ବୋଲର ସହ ଅଲରାଉଣ୍ଡର ଭାବେ ପରିଚିତ ଥିଲେ ରୋଜର ବିନ୍ନି । 1983 ବିଶ୍ବକପ୍ର ସର୍ବାଧିକ ୱିକେଟ୍ ନେଇଥିବା ରେକର୍ଡ ତାଙ୍କ ନାଁରେ ରହିଛି । ସେ ୨୭ ଟି ଟେଷ୍ଟ ମ୍ୟାଚ ଖେଳିଥିବା ବେଳେ ୭୨ ଟି ଦିନିକିଆ ମ୍ୟାଚରେ ଭାରତର ପ୍ରତିନିଧିତ୍ବ କରିଛନ୍ତି । ଏହା ସହିତ ରୋଜର ବିନ୍ନି କର୍ଣ୍ଣାଟକ କ୍ରିକେଟ୍ ଆସୋସିଏସନର ମଧ୍ୟ ସଭାପତି ଥିଲେ । ବର୍ତ୍ତମାନ ସେ ବିସିସିଆଇ ସଭାପତି ହେବା ପରେ ରାଜ୍ୟ କ୍ରିକେଟ୍ ଆସୋସିଏସନର ସଭାପତି ପଦରୁ ଇସ୍ତଫା ଦେବେ ।
